सरकारको नेतृत्व फेरिएपिच्छे आर्थिक उन्नतिका अनेक कुरा गरिन्छन् । एकपछि अर्को गर्दै प्रतिवद्धता व्यक्त हुन्छन् । त्यसको केही समयपछि हुने समीक्षाले नतिजा पूरै ऋणात्मक मात्र देखाउछ । विगतदेखि लागेको यो सरुवा रोग यसपटक पनि लागेको जस्तो देखिन्छ । कार्यान्वयन गर्ने संयन्त्रको विकास नै नगरी भटाभट कार्यक्रम तय गर्ने र प्रतिफल शून्य हातपार्ने परम्परा विगतदेखि नै बसेको छ । जनतालाई रोजगारी दिने, खाद्य सुरक्षा गर्ने, खेतीपातीको मौसममा सिंचाई, मल बीउ सहज रुपमा उपलब्ध गराउने कुरा गरे पनि काममा भने सिन्को भाचिएको पाइदैन ।