भारतीय राजदूत राकेश सुदले पछिल्लो समयमा आएर आफ्नो निर्देशन र सल्लाहलाई बदल्न थालेका छन् । अघिल्लो साता गणतन्त्र नेपालमा को प्रधानमन्त्री बन्ने, को राष्ट्रपति बन्ने र को सभाध्यक्ष बन्ने भन्ने विषयमा राजनीतिक दलका नेताहरुलाई निर्देशन दिंदैआएका राजदूत सुदले पछिल्लोपटक सरकार गठनका लागि संविधान संशोधनभन्दा राजनीतिक सहमति जुटाउनुपर्ने धारणा राखेर कांग्रेस र एमालेको चाहनामा तुषारापात गरिदिएका छन् ।

राजदूत सुदले नेपाल आगमनसंगै सुरुभएको राजनीतिक सक्रियताको जनमानसमा बढी नै आलोचना हुन थालेपछि आफूले कसैलाई केही निर्देशन नदिएको स्पष्टिकरण समेत दिन भ्याएका छन् । यति हुँदाहुँदै उनले गत शनिवार संविधान संशोधनभन्दा पनि राजनीतिक सहमति गर्नुपर्छ भनेर अर्को निर्देशन दिएका छन् । अन्तरिम संविधानमा सरकार गठन र विघटनका लागि लोकतान्त्रिक मूल्य र मान्यतालाई लत्याउने गरी व्यवस्थित गरिएको दर्ुइ तिहाई मतको प्रावधानलाई लिएर राजदूत सुदले माओवादीलाई जसरी पनि सत्तामा ल्याउनुपर्ने निचोडसहित संशोधन होइन सहमति कायम गर भन्ने उर्दी जारी गरेका हुन् । नेपालको आन्तरिक राजनीतिमा बलियो पकड जमाउन अनेक षड्यन्त्रात्मक खेल खेलिरहेको भारतको यो चाहनालाई शिरोधार्य गर्दै प्रधानमन्त्री गरिजाप्रसाद कोइरालाले माओवादी अध्यक्ष प्रचण्डलाई सरकार गठन गर्न राजनीतिक सहमति कायम गर्न आव्हान समेत गरिसक्नुभएको छ ।