काठमाडौं । कांग्रेसका वरिष्ठ नेता शेरबहादुर देउवालाई कांग्रेस संविधानसभा दलको नेता बनाउन उनकी पत्नी आरुजु सक्रिय रुपमा लागिपरेको कांग्रेस निकट स्रोतले बताएको छ । नेता पत्नी भएकै भरमा महिला कोटाबाट सभासद् भएकी आरुजुले महिला सभासद्लाई आफ्नो पक्षमा संगठित गर्न अभियान नै थालेकी छिन् ।

सभासद् हुनुअघि सूदुरपश्चिम तथा देशका अन्य भागमा आइएनजीओका कार्यक्रम संचालन गर्दै आएकी आरुजुले कांग्रेसका अन्य महिला सभासद्लाई पनि त्यसैको प्रलोभनमा पारेर संगठित गराएको खबर छ । कांग्रेसको महिला नेतृत्व समेत हत्याउने उद्देश्यका साथ श्रीमान्लाई नेता बनाउन आरुजू सक्रिय भएकी हुन् । अहिले उनको पक्षमा केही सभासद् उभिइसकेको बुझिएको छ ।

राजनीतिक सहमति बन्न नसकेर बहुमतीय प्रणालीबाट प्रधानमन्त्री चयन गर्ने परिस्थिति सिर्जना भएपछि आरुजूको सक्रियाता थप बढेको खबरसूत्रले बताएको छ । अहिले नै प्रधानमन्त्री हुन नसके पनि सत्ता समीकरण बदलिएर सरकार परिवर्तन भएमा शेरबहादुर प्रधानमन्त्री हुने र त्यसपछि आफ्नो स्वार्थ पूरा हुने दाउमा एकीकरणअघि प्रजातान्त्रिक कांग्रेसमा नरहेका महिला लगायत कतिपय पुरुष नेताहरु पनि उनकै पक्षमा लाग्न तयार भएका छन् ।

खबरस्रोतका अनुसार सभासद्हरु कमला पन्त, अम्बिका बस्नेत, पुष्पा भूषाल, रत्ना शेरचन, ललिता किङरिङ लगायतका महिला सभासद् आरुजुको पक्षमा उभिइसकेका छन् । कांग्रेस संस्थापन पक्षका महिला सभासद्ले भने शेरबहादुर पत्नीको चलखेलको विरोध गर्दै आएका छन् । उनीहरुले भर्खरै कांग्रेसको राजनीतिमा आएकी आरुजुले संर्घष्ाशील र इमान्दार महिला नेतृहरुलाई ओझेलमा पार्न खोजेको आरोप लगाएका छन् ।

पत्रकार सुरक्षाको माग
जनकपुर । तर्राईमा मधेसवादी सशस्त्र समूहहरुले पत्रकारहरुलाई राष्ट्रभाषा नेपालीमा समाचार प्रकाशन, प्रसारण नगर्न धम्की दिएर टेलिफोन गर्न थालेकले पत्रकारहरु असुरक्षा महसुस गर्न थालेका छन् । स्थानीय पत्रकारहरुले गत २५ गते शनिवार संचारकर्मीको सुरक्षाको माग गर्दै वितण्डावाजीहरुको धम्कीविरुद्ध पर््रदर्शन समेत गरेका छन् । हतियारको बलमा पत्रकार धम्क्याउने क्रम नरोकिएमा चरणवद्ध आन्दोलनमा उत्रने घोषणा नेपाल पत्रकार महासंघको जनकपुर शाखाले गरेको छ ।