काठमाडौं । संविधानसभाको निर्वाचनमा कुनै पनि दलले स्पष्ट बहुमत नल्याउनुको अर्थ सवै दलहरु मिलेर काम गर्नु हो । तर अहिले दलहरुबीच आपसी हानथाप र अहंकार तथा बाहिरी निर्देशन पालना गर्दा मुलुकको आवश्यकता पूरा भएन । र्सवदलीय सहमतिको राष्ट्रिय सरकार गठनको सपना देख्ने नेपाली जनताको सपना आखिर सपनामै सीमित रहृयो- राष्ट्रिय सरकार तासको महल सावित भयो ।

नेपालका राजनीतिक दल तथा तिनका नेताहरुलाई पालैपालो खेलाएर आफ्नो अभीष्ट पूरा गर्ने भारतको रणनीतिक जालमा पार्ने र त्यसमा फसेर नेताहरुले आफ्नो महत्वकांक्षा बढाउने र राजनीतिक भविष्य सुरक्षित देख्ने गरेका कारण पनि मुलुकको राजनीति अरुकै हातमा पुगेको हो । पछिल्लो समय सहमतिका लागि भएको प्रयास पनि यसैको निरन्तरता थियो । यो केवल देखाउँने दाँत मात्र थियो ।

अघिल्लो हप्ता जुन रुपमा राजनीतिक सहमतिको प्रयास भयो यसको एउटै मात्र कारण नेपालका लागि भारतीय राजदूत राकेश सुदको निर्देशन हो । यदि इमान्दार भएर नेताहरु सहमति जुटाउन लागिपरेका भए झिना मसिना कुरामा विमती राखेर सरकार गठनका लागि राष्ट्रपतिबाट प्रदान गरिएको समय व्यतित गर्ने थिएनन् । नेताहरुमाथि एकपछि अर्को गर्दै लागिरहेको भारतपरस्तको आरोप यस्तै घटनाहरुले पुष्टि गर्दछ । आफूलाई नेपाल र नेपालीको पक्षमा रहेको स्वाङ पारेर भारतको गुलामी गर्नेहरुको यहाँ कमी छैन । त्यसै भएर त नेपालको राजनीतिको नियन्त्रक यन्त्र दिल्लीमा रहेको विश्लेषकहरु बताउँछन् ।

नेपालका प्रमुख राजनीतिक दलहरु भारतकै आड भरोसामा आफ्नो राजनीतिक यात्रा सफल हुने भ्रममा रहेका छन् । उनीहरुको यही मनोदसा बुझेर नै भारतले सवैलाई पालैपालो खेलाउने गरेको छ । कहिले कांग्रेसलाई उचाल्ने त कहिले माओवादीलाई । अनि कहिले एमालेलाई त कहिले फोरमलाई । हुँदाहुँदा अब पर्ूव राजालाई समेत भारतीय राजदूतले बारम्बार भेटेको समाचारहरु प्रकाशमा आउनुलाई नेपालको भविष्य शुभ नरहेको संकेत राजनीतिक विश्लेषकहरुले गरिरहेका छन् । सवैलाई आफ्नो स्वार्थअनुकूल प्रयोग गर्न खप्पिस देखिएको भारतले प्रयोग गरेको सहमतिको राष्ट्रिय सरकारको कार्ड बाहिरी रुपमा जति सुन्दर देखियो, त्यति नै कुरुप डिजाइनमा उपयोग गरेर मिल्काउने रणनीति बमोजिम थियो र त्यो एउटा तासको महल थियो भन्ने प्रष्ट भएको छ ।