काठमाडौं । नेपालको राजनीतिक मानचित्रबाट एउटा दलको अस्तित्व विलीन भए पनि त्यो दलको संवैधानिक हैसियत भने अझै कायम छ । नेपाली काग्रेस र नेपाली कांग्रेस प्रजातान्त्रिकको एकता भएपछि प्रजातान्त्रिक कांग्रेस राजनीतिक मानचित्रमा हराउन पुगेको हो । यद्यपि यसको संवैधानिक हैसियत भने कायम छ ।

नेपालको अन्तरिम संविधान २०६३ मा गठबन्धनमा रहेका आठ दलमध्ये एक नेपाली कांग्रेस प्रजातान्त्रिकको समेत नाम र सहभागिता रहेको छ । संविधान पारित गर्नेमा उसको पनि हस्ताक्षर रहेको छ । तर अहिले सो दलको हैसियत छैन । निर्वाचन आयोगले प्रजातान्त्रिक कांग्रेसको अस्तित्व विलिन भएको जानकारी पाए पनि संविधानमा सो कुरालाई सच्याइएको छैन । त्यतिबेला कायम भएको आठदलीय गठबन्धन अहिले सात दलमा परिणत भएको छ । यसमा पनि संविधान संशोधन गर्नुपर्ने हो कि होइन भन्ने आमजिज्ञासा छ ।