युगसम्बाद साप्ताहिक
Yugasambad Saptahik
Wednesday, 10.16.2019, 02:48pm (GMT+5.5) Home Contact
 
 
::| Keyword:       [Advance Search]  
 
All News  
मुख्य समाचार
सम्पादकीय
दृष्‍टिकोण
आर्थिक
अन्तरर्वाता
विचार विवेचना
साहित्य भाषा
अन्तराष्ट्रिय
खेलकुद
कृति समीक्षा
अन्य समाचार
आजको समाचार
तस्वीरको बोली
दस्तावेज
विशेष रिपोर्ट
 
 
दृष्‍टिकोण
 
वर्षा सुरु भएपछि कस्तो होला काठमाडौको हालत ?
Tuesday, 05.28.2013, 08:12am (GMT+5.5)

मञ्जुश्रीले चोभारको डाँडो काटेर पानीको निकास खोलेपछि काठमाडौं उपत्यकामा मानव वस्तीको विकास भयो भन्ने पौराणिक कथा छ । सो कथा अनुसार राजधानी उपत्यका ठूलो तलाउ थियो । यसको भूबनोट हेर्दा पनि हो जस्तै लाग्छ । कचौरा आकारका उपत्यका घना आवादीका लागि उपयुक्त नभए पनि सेवा, सुविधा र अवसरको केन्द्रीकृत अवस्थाले गर्दा राजधानीमा धान्नै नसकिने चाप परेको छ । यसैका कारण राजधानी उपत्यकाले अनेक किसिमका समस्या भोगिरहेको छ । 

खाने पानीको समस्या, ढल निकासको समस्या, सडकको समस्या, शान्ति सुरक्षाको समस्या लगायत अनगिन्ती समस्याको भण्डार भए पनि राजधानीप्रतिको आकर्षणमा कुनै कमी आएको छैन । त्यसैले राजधानीबासी एकपछि अर्को गर्दै समस्याको जञ्जालमा बेरिंदै छन् । यस्तै समस्यामा बेरिने क्रममा पछिल्लो समय सडक विस्तार र निर्माणको सुस्त गति पनि थपिएको छ ।

अघिल्लो सरकारले सुरु गरेको राजधानीको सडक विस्तार कार्यले राजधानीका सडकहरू फराकिलो त बन्यो तर समयमै भत्काइएका संरचनाहरूको निर्माण कार्य सम्पन्न नहुँदा यतिबेला राजधानीबासी ठूलो सकसमा परेका छन् । वर्षायाम सुरु हुनु अगावै सडक मर्मतकार्य सम्पन्न भैसक्ने सरकारी दावी मित्थ्या सावित भैरहेको छ । प्रि–मनसुनका रुपमा फाटफुट हुने वर्षाले पनि राजधानीको बेहाल हुने गरेको अवस्था छ । बिहिबार परेको मुसलधारे पानीले राजधानीको जनजीवन यति अस्तव्यस्त बनायो कि असार–साउन सुरु भएपछि के होला भन्ने त्रास उत्पन्न छ ।

विकास निर्माणको काम सुरु गर्ने तर समयमै सम्पन्न नगर्ने प्रवृत्तिको निरन्तरतामा कहिल्यै पूर्ण बिराम लागेन । राजधानीको त हालत यस्तो छ भने देशका दुर्गम भेगमा संचालन भएका विकास आयोजनाको हालत के होला भन्ने सहजै अनुमान गर्न सकिन्छ । सरकारका उच्च अधिकारीहरू सडक निर्माणको अनुगमन गर्दै समयमै काम सम्पन्न नगरे कारवाही गरिनेछ भने पनि परिणाम त्यस्तो छैन । निर्माण व्यवसायीका रुपमा राजनीतिक दलका कार्यकर्ता तथा ‘दादा’हरूको संलग्नताले गर्दा हेपाहा प्रवृत्ति हावी भैरहेको छ । व्यावसायिक दक्षताले नभै राजनीतिक आड भरोसाले ठेक्का लिने र मोटो रकम कमिशनका रुपमा दिने गर्दा निर्माणको गुणस्तरमा पनि ठूलो घोटाला भैरहेको छ ।

सडक, जलविद्युत, पुल, सिंचाई आयोजना जस्ता मुलुकको आर्थिक विकासमा महत्वपूर्ण टेवा दिने क्षेत्रको निर्माणका लागि पनि राजनीतिक प्रभावले काम गर्दा नेपालको विकास निर्माणको हालत अत्यन्त नाजुक हुन पुगेको छ । यतिबेला राजधानीबासीले भोगेको पीडा त्यस्तै हो । ढल निकासको उचित प्रबन्ध नभएको राजधानीमा सानो पानी पर्दा पनि सडक पोखरीमा परिणत हुने गरेको छ । यस्तो समस्याको समाधान गुणस्तरीय निर्माण र निकासको उचित प्रबन्ध हो तर यतातिर कमै मात्र ध्यान दिने गरिएको छ ।

तोकिएको जिम्मेवारी समयमै पूरा नगर्ने गर्दा जनताले सधै सास्ती पाउनुपर्ने अवस्था छ । घाम लागे धुलो उडेर हिंड्न नसकिने त पानी परे जताततै पोखरी नै पोखरी हुने गरेको राजधानीमा भत्काइएका संरचनाको टिकाउपूर्ण निर्माण भएन भने सोच्दै नसोचेको दुर्घटना हुने अवस्था सिर्जित छ । बिहिबार भएको वर्षाले नै यसको संकेत दिएको छ । जताततै पानी नै पानी र भत्किएको सडकका कारण पैदल यात्री र सवारी साधनको यात्रा जोखिमपूर्ण बन्न पुगेको छ ।

एक दिन पानी नपरे राजधानी धुलाम्मे तथा एक घण्टा पानी परे हिलाम्मे र जलमग्न हुन्छ । यस्तो अवस्थाको अन्त्यका लागि गुणस्तरीय निर्माण त्यो पनि समयमै हुनु अति आवश्यक छ । अबको केही हप्ताबाट मनसुन सुरु हुन्छ । मनसुन सुरु भएपछि राजधानीको सडकको हालत के हुने हो भन्ने चिन्ता र त्रास यससंगै उब्जिएको छ । इमान्दार ढंगले काम गरे सडक विस्तारका क्रममा भत्काइएका संरचनाको बाँकी काम सम्पन्न नहुने होइन तर त्यसैलाई बहाना बनाएर अनधिकृत लाभ लिने सोचले गर्दा समयमै काम सम्पन्न हुन सकिरहेको छैन । 

सरकारी निकायको अनुगमनको पनि केही अर्थ छैन । सडक किनारमा थुपारिएका गिट्टी तथा ढुंगा हप्तौंसम्म फिजाइएको हुँदैन, पर्खाल लगाउने ठाउँमा दुईजना कामदार खटिएका हुन्छन् । अनि कसरी समयमा काम सकिन्छ ? यति मात्र होइन कार्यालय समयमा सडकको बीच भाग खन्ने गरिन्छ । सडक अबरुद्ध हुने किसिमका कामहरू रातको समयमा गर्दा सबभन्दा उत्तम हुने भए पनि ठेकेदारले काम सुचारु भैरहेको देखाउन मात्र सडकमा मजदुर खटाउने गरेका छन् ।

काममा घोटाला भैरहेको छ, ढिलासुस्ती भैरहेको छ भन्ने जानकार सरकारी निकायले राजनीतिक दवावमा कानुन बमोजिम चाल्नुपर्ने कदम समेत चाल्ने गरेका छैनन् । त्यस्ता अनियमितताप्रति आँखा चिम्लिए उल्टै प्रोत्साहन पाइने हुँदा प्रलोभनका कारण सरकारी काम कहिले जाला घामको शैलीमा मात्र काम भैरहेको छ । 


Rating (Votes: )   
Share     Print


Other Articles:
जनताले सम्झिरहने मदन भण्डारी (05.21.2013)
बन्द फिर्ता : जनतालाई दुःख नदिने निर्णय ! (05.14.2013)
दिल्लीमा प्रचण्डको प्रशंसै प्रशंसा ! (05.07.2013)
प्रजातन्त्र–लोकतन्त्र र गणतन्त्र (04.29.2013)
सहमतिको प्रयास नहुनु अशुभ संकेत (04.22.2013)
कांग्रेसको त्रिवेणी भेलाको निहितार्थ (04.16.2013)
राष्ट्रिय आकांक्षा ओझेलमा (04.09.2013)
समयमै सचेत हुनु बुद्धिमानी (04.01.2013)
किन हुन्छन् विवादास्पद निर्णय ? (03.25.2013)
नेताहरू मुलुक असफल बनाउन सफल (03.18.2013)
समतामूलक सामाजिक संरचनाको आवश्यकता (03.11.2013)
विकृतिको जड नै शक्तिशाली (03.04.2013)
प्रजातन्त्र दिवस : सन्दर्भभित्रका कुरा (02.27.2013)
एकीकरण ताकाको राज्य सहकारी खडा गरौं - खगेन्द्रराज सिटौला (02.11.2013)
सिद्धान्तविहीन परनिर्देशित राजनीतिको परिणाम (02.04.2013)
सिद्धान्तहीन गठबन्धनका विकृत उपजहरू (01.28.2013)
गुम्दो राष्ट्रिय प्रतिष्ठा (01.21.2013)
महिला हिंसा : विकृत मानसिकताको उपज (01.08.2013)
समानताको नाराभित्र कैद महिला अधिकार (01.01.2013)
अभिषाप बनेको एउटा कलंकित प्रथा (12.24.2012)



 
::| Latest News

 
[Page Top]