युगसम्बाद साप्ताहिक
Yugasambad Saptahik
Tuesday, 11.21.2017, 01:44pm (GMT+5.5) Home Contact
 
 
::| Keyword:       [Advance Search]  
 
All News  
मुख्य समाचार
सम्पादकीय
दृष्‍टिकोण
आर्थिक
अन्तरर्वाता
विचार विवेचना
साहित्य भाषा
अन्तराष्ट्रिय
खेलकुद
कृति समीक्षा
अन्य समाचार
आजको समाचार
तस्वीरको बोली
दस्तावेज
विशेष रिपोर्ट
 
 
दृष्‍टिकोण
 
निर्वाचनको महाकुम्भमा मुलुक
Tuesday, 11.07.2017, 11:04am (GMT+5.5)

- यादब देवकोटा
संविधानसभाले जारी गरेको ऐतिहासिक संविधान कार्यान्वयनको अन्तिम चरणका रुपमा रहेको प्रतिनिधिसभा र प्रदेशसभाको निर्वाचनको मनोनयन दर्ता र अन्तिम नामावली प्रकाशनसंगै मुलुक निर्वाचनको महाकुम्भमा होमिएको छ  । 
आउँदो मंसिर १० र २१ गते हुने प्रतिनिधि सभा तथा प्रदेश सभा सदस्य निर्वाचनको प्रत्यक्षतर्फको उम्मेदवार मनोनयन दर्ता १६ गते बिहिबार उत्साहप्रद रुपमा शान्तिपूर्ण सम्पन्न भएको छ  । बिहिबार बिहान १० बजेदेखि साँझ ६ बजेसम्म प्रतिनिधि सभातर्फ र प्रदेश सभा सदस्यका लागि प्रतिनिधि सभा र प्रदेश सभा सदस्य निर्वाचनको प्रत्यक्ष निर्वाचन प्रणालीतर्फ चार हजार ७०८ जनाको उम्मेदवारी परेको छ  । प्रतिनिधि सभातर्फ एक हजार ७४२ र प्रदेश सभातर्फ दुई हजार ९६६ उम्मेदवारी दर्ता भएको छ ।
दोस्रो चरणअन्तर्गत ४५ जिल्लाका प्रतिनिधि सभातर्फ १२८ निर्वाचन क्षेत्र र प्रदेशसभा तर्फ २५६ निर्वाचन क्षेत्रका लागि मुख्य निर्वाचन अधिकृत र निर्वाचन अधिकृतको कार्यालयमा उम्मेदवारी दर्ताको व्यवस्था गरिएको थियो  । 
प्रतिनिधि सभा तथा प्रदेश सभा सदस्य निर्वाचनमा उम्मेदवारको मनोनयन गर्नेमा पहिले जस्तै महिलाको संख्या कमै देखियो  । प्रतिनिधि सभातर्फ १२६ र प्रदेश सभातर्फ २०९ गरी जम्मा ३३४ महिलाको उम्मेदवारी परेको छ  । यद्यपि उम्मेदवारी दर्ताका लागि महिला मतदाताको उपस्थिति भने उत्साहजनक रहेको देखिन्थ्यो ।
निर्वाचन आयोगले राजनीतिक दलको उत्साहजनक सहभागितामा भएको उम्मेदवार मनोनयन कार्यले प्रतिनिधि सभा तथा प्रदेश सभा सदस्य निर्वाचनप्रतिको सबै किसिमका आशंका हटेर देश पूर्णरुपमा निर्वाचनको उत्सवमा होमिएको बताएको छ ।
उम्मेदवारले निर्वाचन चिह्न प्राप्त गरेपछि औपचारिकरूपमा चुनावी प्रचारप्रसारको अवधि शुरू हुनेछ  । उम्मेदवारको मनोनयनपत्र दर्ता भएपछि सबै उम्मेदवारलाई निर्वाचन आचारसंहिता लागू हुने भएकाले सबै राजनीतिक दल तथा उम्मेदवारबाट निर्वाचन आचारसंहितको पूर्ण पालना हुने विश्वास लिएको आयोगले जनाएको छ ।
सबैलाई धन्यवाद
प्रमुख निर्वाचन आयुक्त डा अयोधीप्रसाद यादवले दोस्रो चरणअन्तर्गत आगामी मङ्सिर २१ गते हुने प्रतिनिधि सभा र प्रदेश सभाको प्रत्यक्षतर्फको निर्वाचनका लागि राजनीतिक दलको उल्लासपूर्ण सहभागितामा उम्मेदवारी मनोनयन दर्ता भएकोमा खुशी प्रकट गर्दै सवैप्रति धन्यवाद ज्ञापन गर्नुभएको छ ।
पत्रकारसँग कुराकानी गर्दै उहाँले उम्मेदवारी दर्तामा देखिएको मीत्रभाव र उत्साहलाई निर्वाचन आचारसंहिता पालनामा पनि कायम राख्न राजनीतिक दल र उम्मेदवारलाई सुझाव दिनुभयो ।

शीर्ष नेताको प्रतिस्पर्धा यस्तो छ
प्रमुख राजनीतिक दलदेखि साना राजनीतिक दलका नेताले आआफ्नो क्षेत्रबाट उम्मेदवारी दर्ता गराएका छन्  । नेपाली काँग्रेसका सभापतिसमेत रहनुभएका शेरबहादुर देउवाले वारेशनामा गणेश पन्तमार्फत डडेल्धुरामा आफ्नो मनोनयन दर्ता गराउनुभएको छ  । उहाँको प्रतिस्पर्धीका रुपमा वाम गठबन्धनका तर्फबाट खगराज भट्टले उम्मेदवारी दर्ता गराउनुभएको छ  । 
काँग्रेसका वरिष्ठ नेता रामचन्द्र पौडेलले तनहुँ क्षेत्र नं १ बाट उम्मेदवारी दर्ता गराउनुभएको छ  । टिकट वितरणमा असन्तुष्टि जनाउँदै काँग्रेसकै अर्का नेता गोविन्दराज जोशीले समेत सोही क्षेत्रबाट उम्मेदवारी दिए पनि उहाँको उम्मेदवारी खारेज भएको छ  । 
काँग्रेसका महामन्त्री शशांक कोइराला नवलपरासी–१ बाट उम्मेदवार बन्नुभएको छ  । काँग्रेसका अर्का नेता विमलेन्द्र निधि धनुषा क्षेत्र नं ३ बाट उम्मेदवार हुनुभएको छ  । उहाँको प्रतिस्पर्धीका रुपमा वाम गठबन्धनले रामसिंह यादवलाई प्रतिस्पर्धामा उतारेको छ भने राजपा अध्यक्ष मण्डलका सदस्य राजेन्द्र महतोसमेत सोही क्षेत्रबाट उम्मेदवार हुनुहुन्छ  । 
यसैगरी काँग्रेस नेता कृष्ण सिटौला झापा–३, विजयकुमार गच्छदार सुनसरी–३, मीनेन्द्र रिजाल मोरङ–२ बाट चुनावी प्रतिस्पर्धामा हुनुहुन्छ  । त्यस्तै काँग्रेसका पूर्वमहामन्त्री प्रकाशमान सिंहले काठमाडौँ– १ बाट उम्मेदवारी दिनुभएको छ  । उहाँका प्रतिस्पर्धीमा वाम गठबन्धनबाट विद्यार्थी नेता अनिल शर्मा र  विवेकशील साझा पार्टीका रवीन्द्र मिश्र चुनावी मैदानमा हुनुहुन्छ  । काठमाडौँ क्षेत्र नं ४ मा काँग्रेसका युवा नेता गगन थापा र वाम गठबन्धनका तर्फबाट राजन भट्टराई प्रतिस्पर्धी हुनुहुन्छ  ।  
नेकपा(एमाले)का अध्यक्ष केपी शर्मा ओलीले झापा क्षेत्र नं ५ बाट उम्मेदवारी दर्ता गराउनुभएको छ  । उहाँको प्रतिस्पर्धीका रुपमा काँग्रेसले खगेन्द्र अधिकारीलाई उम्मेदवार बनाएको छ  । अधिकारी त्रिचन्द्र क्याम्पसको प्राध्यापकबाट राजीनामा दिएर उम्मेदवार बन्नुभएको हो  । 
यस्तै इलाम क्षेत्र नं १ बाट एमालेका वरिष्ठ नेता झलनाथ खनाल र सोही जिल्लाको क्षेत्र नं २ बाट सुवास नेम्वाङले उम्मेदवारी दर्ता गराउनुभएको छ  । नेता खनालको प्रतिस्पर्धीका रुपमा काँग्रेसले भूपेन्द्र कट्टेललाई उम्मेदवार बनाएको छ भने पूर्वसभामुखसमेत रहनुभएका नेम्वाङको प्रतिस्पर्धीका रुपमा काँग्रेसले केशव थापालाई उम्मेदवार बनाएको छ  । 
यस्तै काठमाडौँ क्षेत्र नं २ मा वाम गठबन्धनका तर्फबाट पूर्वप्रधानमन्त्री माधकुमार नेपालले आफ्नो उम्मेदवारी दिनुभएको  छ  । उहाँको प्रतिस्पर्धीका रुपमा काँग्रेसले दीपक कुइँकेललाई उम्मेदवार बनाएको छ  । काठमाडौँ क्षेत्र नं ५ बाट वाम गठबन्धनको साझा उम्मेदवारका रुपमा एमाले महासचिव ईश्वर पोखरेल र काँग्रेसका तर्फबाट डा प्रकाशशरण महत उम्मेदवार हुनुहुन्छ  । 
एमालेका उपाध्यक्ष वामदेव गौतमले बर्दिया क्षेत्र नं १ बाट उम्मेदवारी दिनुभएको छ  । गौतमको प्रतिस्पर्धीका रुपमा काँग्रेसले सिँचाइ मन्त्रीसमेत रहनुभएका सञ्जय गौतमलाई उम्मेदवार बनाएको छ  । वाम गठन्धनका तर्फबाट एमाले उपाध्यक्ष भीम रावल अछाम १ बाट उम्मेदवार हुनुहुन्छ भने उहाँको प्रतिस्पर्धीका रुपमा काँग्रेसबाट भरतकुमार स्वाँर चुनावी मैदानमा हुनुहुन्छ  । 
एमालेका उपमहासचिव विष्णु पौडेल रुपन्देही क्षेत्र नं ३ बाट उम्मेदवार हुनुहुन्छ भने उहाँको प्रतिस्पर्धीका रुपमा युवराज गिरीलाई काँग्रेसले उम्मेदवार बनाएको छ  । 
यसैगरी पूर्वप्रधानमन्त्रीसमेत रहनुभएका नेकपा(माओवादी केन्द्र)का अध्यक्ष पुष्पकमल दाहाल ‘प्रचण्ड’ले चितवन क्षेत्र नं ३ बाट उम्मेदवारी दर्ता गराउनुभएको छ  । उहाँका प्रतिस्पर्धीका रुपमा काँग्रेसको समर्थनमा राष्ट्रिय प्रजातन्त्र पार्टी (प्रजातान्त्रिक)का नेता विक्रम पाण्डेले उम्मेदवारी दिनुभएको छ  । 
नेकपा(माओवादी केन्द्र)का नेता नारायणकाजी श्रेष्ठले पहिलो चरणको निर्वाचनका लागि गोरखा क्षेत्र नं २ बाट उम्मेदवारी दर्ता गराईसक्नुभएको छ  । माओवादी केन्द्रका नेता कृष्णबहादुर महरा दाङ निर्वाचन क्षेत्र नं २ बाट उम्मेदवारी दर्ता गराउनुभएको छ  । 
वाम गठबन्धनको साझा उम्मेदवारका रुपमा रहनुभएका महराको प्रतिस्पर्धीका रुपमा काँग्रेसले राजु खनाललाई मैदानमा उतारेको छ  । यस्तै माओवादी केन्द्रका नेता एवं पूर्वउपप्रधानमन्त्री टोपबहादुर रायमाझी अर्घाखाँचीबाट उम्मेदवार बन्नुभएको छ  । उहाँका प्रतिस्पर्धीका रुपमा रामबहादुर विसी हुनुहुन्छ  । 
माओवादी केन्द्रका प्रवक्ता पम्फा भुसाल ललितपुर क्षेत्र नं ३ बाट,   सोहि पार्टीका नेता गिरिराजमणि पोखरेल महोत्तरी– १ बाट, हितमान शाक्य काठमाडौँ– १० बाट र झक्कु सुवेदी काठमाडौँ– ६ बाट उम्मेदवार हुनुहुन्छ  । माओवादी केन्द्रका अर्का नेता मातृकाप्रसाद यादव धनुषा क्षेत्र नं १ बाट उम्मेदवार बन्नुभएको छ भने उहाँको प्रतिस्पर्धीका रुपमा काँग्रेसका आनन्दप्रसाद ढुंगाना हुनुहुन्छ  । धनुषा–२ बाट वाम गठबन्धनको साझा उम्मेदवारका रुपमा रामचन्द्र झा उम्मेदवार हुनुहुन्छ  । उहाँका प्रतिस्पर्धीका रुपमा कृषि विकासमन्त्रीसमेत रहनुभएका काँग्रेसका नेता रामकृष्ण यादव हुनुहुन्छ  । पूर्वसूचना तथा सञ्चारमन्त्री सुरेन्द्रकुमार कार्की झापा क्षेत्र नं १ बाट उम्मेदवार हुनुहुन्छ  । उहाँका प्रतिस्पर्धीका रुपमा काँग्रेसका युवा नेता विश्वप्रकाश शर्मा हुनुहुन्छ  । 
यस्तै संघीय समाजवादी फोरम नेपालका अध्यक्ष उपेन्द्र यादवले सप्तरी निर्वाचन क्षेत्र नं २ बाट उम्मेदवारी दर्ता गराउनुभएको छ  । उहाँको प्रतिस्पर्धीका रुपमा वाम गठबन्धनका तर्फबाट उमेशकुमार यादव, काँग्रेसबाट सकलदेव सुतीहार र स्वतन्त्ररुपमा राजपाका तर्फबाट जयप्रकाश ठाकुरले उम्मेदवारी दिनुभएको छ  । 
सोही पार्टीका अर्का नेता अशोक राई काँग्रेसको समर्थनमा सुनसरी क्षेत्र नं १ बाट उम्मेदवार बन्नुभएको छ  । राष्ट्रिय प्रजातन्त्र पार्टीका अध्यक्ष एवं उपप्रधानमन्त्री कमल थापाले काँग्रेससहितको समर्थनमा मकवानपुर क्षेत्र नं १ बाट उम्मेदवारी दर्ता गराउनुभएको छ  । उहाँको प्रतिस्पर्धीका रुपमा वाम गठबन्धनले कृष्णप्रसाद दाहाललाई उम्मेदवार बनाएको छ  । 
राजपाका अध्यक्ष मण्डलका संयोजक महन्थ ठाकुर महोत्तरी– ३ बाट प्रदेशसभा सदस्यका लागि उम्मेदवार हुनुहुन्छ  । उहाँका प्रतिस्पर्धीका रुपमा सोही दलका सांसद चन्द्रेश्वर झा स्वतन्त्र रुपमा उम्मेदवारी दिनुभएको छ  ।  
उम्मेदवारी दिएका चर्चित अनुहारहरु
नेपाल प्रहरीको महानिरीक्षक बन्नबाट रोकेर आफूलाई राज्यले अन्याय गरेको बताउँदै आउनुभएका नेपाल प्रहरीका पूर्व डीआइजी नवराज सिलवालले ललितपुर क्षेत्र नम्बर १ बाट एमालेको तर्फबाट उम्मेदवारी मनोनयन गर्नुभयो ।
उम्मेदवारी दर्तापछि उहाँले आफूमाथि राज्यले अन्याय गरेकाले जनताबाट न्याय पाउन चुनावी मैदानमा उत्रिएको बताउनुभएको हो  । केही दिन अघि “प्रधानमन्त्री शेरवहादुर देउवाले व्यक्तिगत प्रतिशोध साँधेर प्रहरी संगठनै सिध्याउन खोजे  । राज्यबाट न्याय नपाएपछि पार्टीले जनता समक्ष जाने मौका दिएको छ, मलाई जनताले न्याय दिनेछन् ।” भन्नुभयो ।
सिलवालले कांग्रेस नेता तथा अर्थराज्यमन्त्री उदय शमसेर जबरासँग प्रतिस्पर्धा गर्दै हुनुहुन्छ ।
नारायणमानले दिए युवालाई मौका
२०४८ सालदेखि लगातार भक्तपुरबान निर्वा्चित हुँदै आउनुभएका नेपाल मजदुर किसान पार्टीका अध्यक्ष नारायणमान विजुक्छेले यो पटकको निर्वाचनमा उम्मेदवारी दिनुभएए  ।  नेपाल मजदुर किसान पार्टीबाट प्रतिनिधिसभाका लागि भक्तपुर क्षेत्र नम्बर १ मा प्रेम सुवाल र २ मा अनुराधा थापा मगरले मनोनयन दर्ता गरेका हुन्  । नयाँ पुस्तालाई अवसर दिन आफू चुनावमा नउठ्ने निर्णय गरेको उहाँले बताउनुभएको छ ।
गणेश लामा कांग्रेसको तर्फबाट उम्मेदवार
गुण्डा नाइके भनेर प्रचारित गणेश लामाले काभ्रेपलाञ्चोकमा नेपाली कांग्रेसका तर्फबाट प्रदेश सभा सदस्यका लागि उम्मेदवारी दर्ता गराएका छन् ।
उनले काभ्रेपलाञ्चोक–१ को ‘ख’ बाट प्रदेश सभा सदस्यका लागि नेपाली कांग्रेसका तर्फबाट उउम्मेदवारी दर्ता गराएका हुन्  । गत असोज ३० गते नेपाल लोकतान्त्रिक फोरम र कांग्रेसबीचको एकीकरणपछि उनी कांग्रेसका नेताको रुपमा चिनिँदै आएका थिए ।
एकीकरणअघि लोकतान्त्रिक फोरमका केन्द्रीय सदस्य रहेका लामा दोस्रो संविधानसभा निर्वाचनमा तेस्रो भएका थिए  । उनीविरुद्ध विशेष अदालतमा सम्पत्ति शुद्धीकरणको मुद्दा चलिरहेको छ ।
विवेकशील साझाको १५८ जना उम्मेदवार
यसपटक प्रमुख दलहरुलाई टक्कर दिने योजनासहित आएको  विवेकशील साझा पार्टीको उम्मेदवारी चर्चाको शिखरमा छ  । सा पार्टीले प्रतिनिधिसभा र प्रदेशसभाको निर्वाचनका लागि देशभर १५८ जनाको उमेदवारी दर्ता गराएको छ  । पहिलो र दोश्रो चरण गरी प्रतिनिधिसभामा ४ महिला सहित ६७ जना र प्रदेशसभामा ६ महिलासहित ९१ जनाको उमेदवारी परेको छ  । 
प्रतिनिधिसभाका लागि काठमाडौंको १० मध्ये ३ क्षेत्रमा महिला उमेदवार उठाएको पार्टीले उपत्यकाका पन्ध्रै क्षेत्रमा आफ्ना उम्मेदवारहरु खडा गरेको छ भने प्रदेशसभाका लागि उपत्यकाका ३० मध्ये २७ स्थानमा आफ्नो उमेद्वारी प्रस्तुत गरेको छ  उमेद्वारी दर्ता सकिएलगत्तै चुनावी अभियानलाई देशव्यापीरूपमा तिब्रता दिईने पार्टीले बताएको छ ।
सो पार्टीका सबभन्दा चर्चित उम्मेदवार पत्रकार रवीन्द्र मिश्र हुन्  । उनले काठमाडौं क्षेत्र नं. १ बाट उम्मेदवारी दिएका छन्  । 
काठमाडौंमा रोचक भीडन्त
मुलुकको राजधानी रहेको काठमाडौंमा रोचक भिडन्त हुने भएको छ  । वाम गठबन्धन र नेपाली कांग्रेस तथा विवेकशील साझा काठमाडौंको चर्चामा छन्  । राष्ट्रिय सभागृहमा काठमाडौँका निर्वाचन क्षेत्र नं १, २, ३ र ४ को उम्मेदवारी दर्ता भएको छ  । क्षेत्र नं १ मा नेपाली काँग्रेसका नेता प्रकाशमान सिंह, वाम गठबन्धनका तर्फबाट नेकपा (माओवादी केन्द्र) का अनिल शर्मा, विवेकशील साझा पार्टीका रवीन्द्र मिश्र लगायतले उम्मेदवारी दर्ता गर्नुभएको छ ।
क्षेत्र नं २ मा पूर्वप्रधानमन्त्री एवं एमाले नेता माधवकुमार नेपाल र काँग्रेसका तर्फबाट पूर्व सांसद दीपकप्रसाद कुइँकेलले उम्मेदवारी दर्ता गराउनुभएको छ  । यो क्षेत्रबाट विवेकशील साझा पार्टीका सूर्यराज आचार्य, चुरेभावर लोकतान्त्रिक पार्टीका गुणकेशरी गजुरेल, राष्ट्रिय जनशक्ति पार्टीका राजेन्द्र शर्मा, नयाँ शक्तिका गणेशप्रसाद सिम्खडा, संघीय समाजवादी फोरमका शहरमान राई लगायतले उम्मेदवारी दिनुभएको छ ।
 यसैगरी क्षेत्र नं ३ मा प्रतिनिधि सभाका लागि काँग्रेसका तर्फबाट केन्द्रीय सदस्य एवं सहकारी तथा गरिबी निवारणमन्त्री अम्बिका बस्नेत र एमालेका जिल्ला अध्यक्ष कृष्ण राई तथा विवेकशील साझा पार्टीबाट डा सिमिता सिंह लामाले उम्मेदवारी दर्ता गराउनुभयो  । 
त्यस्तै क्षेत्र नं ४ मा प्रतिनिधिसभाका लागि काँग्रेसबाट युवा नेता गगनकुमार थापा र एमालेका राजन भट्टराईले उम्मेदवारी दर्ता गराउनुभयो भने प्रदेश सभातर्फ (क) बाट काँग्रेसका नरोत्तम वैद्य र (ख) बाट साधुराम खड्काले उम्मेदवारी दिनुभयो  । वाम गठबन्धनबाट (क) मा एमालेका निर्मल कुइँकेल र (ख) मा कुसुमकुमार कार्कीले उम्मेदवारी दर्ता गराउनुभयो  । 
क्षेत्र नं ५ प्रतिनिधि सभा सदस्यका लागि नेकपा (एमाले) का महासचिव ईश्वर पोखरेल र नेपाली काँग्रेसका नेता डा प्रकाशशरण महतले उम्मेदवारी दर्ता गराउनुभयो  । 
काठमाडौमा प्रमुख दलका प्रभावशाली नेताहरुको उम्मेदवारी परेका कारण प्रतिस्पर्धा रोचक हुने देखिएको छ ।
बागीको टेन्सन
नेकपा एमाले र माओवादी गठबन्धनले साझा उम्मेदवार उठाए पछि कतिपय स्थानमा असन्तुष्टहरुले बागी उम्मेदवारी दर्ता गराएका छन् भने नेपाली कांग्रेसको अवस्था पनि उस्तै छ  । त्यस्तै मधेशवादी दलका शीर्ष नेताहरु पनि बागी उम्मेदवारका कारण हैरान छन्  । शीर्ष नेताहरुकै क्षेत्रमा आधा दर्जनसम्म स्वतन्त्र उम्मेदवारी परेको छ ।


Rating (Votes: )   
Share     Print


Other Articles:
वाम एकताले ल्याएको तरंग (10.11.2017)
कर्मकाण्डमा सीमित वी.पी. सिद्धान्त (09.12.2017)
प्रथालाई कानुन बनाउन मिल्छ ? (09.06.2017)
प्रकृतिसंग निकट रहने नै प्रकोपको मारमा (08.29.2017)
विपत्तिलाई राजनीतिक रङ्ग नदिउँ (08.15.2017)
‘डोक्लाम’मा आँसु चुहाउने ‘लिपलेक’ नदेख्ने ? (08.08.2017)
सबथोक छ, तर जनताले केही पाएनन् (07.26.2017)
दार्जिलिङ आन्दोलन र नेपालीको भावना (06.28.2017)
निर्वाचन सार्नुको औचित्य के ? (06.22.2017)
हिमालमा लामखुट्टे नाँच्न थाले... (06.15.2017)
राष्ट्रवाद पनि ‘अन्धो–बहिरो’ हुन्छ र ? - यादब देवकोटा (05.31.2017)
दर्शना, शाक्य र थापाको सन्देश (05.24.2017)
स्खलित नैतिकता र गुम्दो इमान (05.11.2017)
अझै कति कुर्ने पीडितले ? - यादब देवकोटा (05.02.2017)
नेता भाड्नतिर जनता जोड्नतिर (04.18.2017)
स्थानीय तह निर्वाचन, युवाहरूको चासो र सन्देश (04.11.2017)
खै त्यो बेलाको जस्तो कूटनीतिक क्षमता (03.22.2017)
खै त्यो बेलाको कूटनीतिक सामथ्र्य (03.14.2017)
शैक्षिक मुद्दा र स्ववियू निर्वाचन (02.28.2017)
माओवादी जनयुद्धका क्रान्ति कि भ्रान्ति ? (02.15.2017)



 
::| Latest News

 
[Page Top]