युगसम्बाद साप्ताहिक
Yugasambad Saptahik
Thursday, 10.24.2019, 12:27am (GMT+5.5) Home Contact
 
 
::| Keyword:       [Advance Search]  
 
All News  
मुख्य समाचार
सम्पादकीय
दृष्‍टिकोण
आर्थिक
अन्तरर्वाता
विचार विवेचना
साहित्य भाषा
अन्तराष्ट्रिय
खेलकुद
कृति समीक्षा
अन्य समाचार
आजको समाचार
तस्वीरको बोली
दस्तावेज
विशेष रिपोर्ट
 
 
सम्पादकीय
 
कैलालीको घटनाबाट पाठ सिकौं
Tuesday, 09.01.2015, 11:47am (GMT+5.5)

अघिल्लो हप्ता  भदौ ७ गते सोमवार कैलालीको टीकापुरमा मच्चिएको विभत्स हत्याकाण्डका अनेक आयामहरू उद्घाटित भैरहेका छन् ।  प्रहरी निहत्था हुनु र आन्दोलनकारी हतियारधारी हुनुको दुर्दान्त परिणतिकै कारण निर्दाेष र अबोध २ वर्षे बालकदेखि लिएर नेपाल प्रहरीका एसएसपी लक्ष्मण न्यौपानेसहित ८ प्रहरीको हत्या हुनु अति असामान्य घटना हो । राष्ट्रिय सद्भाव खल्बल्याउने, एकआपसमा युगौंदेखि मिलेर बसेका जनताबीच बैमनष्यता सिर्जना गराउने र परस्परमा मुठभेट गराई अशान्ति र अराजकताको स्थिति सिर्जना गरी अन्ततः विधिको शासन स्थापना होइन बिखण्डनको बीजारोपण गर्ने दुराशययुक्त षड्यन्त्रको अभ्यासगत क्रमको यो एउटा कडी हो । दण्डहीनता मौलाएको यो मुलुकमा त्यसको लाभ उठाएर बिखण्डनको दुराकाङ्क्षा राख्दै बाह्य निर्देशनमा चलखेल गर्दैआएका केही देशद्रोहीहरूको उक्साहटमा यो दुर्दान्त हत्याकाण्ड रचिएको खुलाशा भैसकेको छ । तराईमा सुनियोजित रुपमा बिखण्डनको आगो सल्काउँदै हिडेका कथित मधेशवादी नेताहरूलाई कानूनको कठघरामा ल्याउनुको सट्टा उल्टै उनीहरूबाट दिइएको चुनौति सुनेर सरकारले आफ्नो निरीहता प्रदर्शन गरिरहेको छ । कैलाली जस्तै तराईका अरू जिल्लामा पनि हत्याकाण्ड मच्चाउने संकेत वीरगञ्जमा प्रहरीमाथि भएको पेट्रोल बमको प्रहार र ठाउँठाउँमा भएका तोडफोड र आगजनीका घटनाले इंगित गरिरहेका छन् । राष्ट्रिय एकता, अखण्डता र सद्भाव विरुद्धका प्रायोजित गतिविधिप्रति राष्ट्रिय सजगता नअपनाउँदा मुलुकको भविष्य नै ठूलो संकटमा परेको छ ।

नेपालको राष्ट्रिय एकता, अखण्डता र स्वाधिनतामाथि अनेक चुनौति खडा भएका छन् । २०६२ मंसिरमा नयाँ दिल्लीमा भएको बाह्रबुँदे संझौतापछि देशको राजनीतिले नयाँ दिशा लियो । नेपालका आठ दलबीच भएको भनिएको त्यो सम्झौताको स्वामित्व नेपाली नेताले होइन भारतका अधिकारीहरूले लिए । त्यसपछिको  नेपालको राजनीतिक परिचालनको केन्द्र नयाँदिल्लीमा स्थानान्तरित भयो । अहिले चलनचल्तीमा रहेका सवैखाले राजनीतिक हस्तिहरूको मार्गनिर्देशनको थलो दिल्ली नै बनेको कुरामा कुनै सन्देह छैन । नेपाली कांंग्रेसका दिवङ्गत नेता गिरिजाप्रसाद कोइरालाले बेलाबेलामा ग्य्राण्ड डिजाइनको कुरा गर्नुहुन्थ्यो भने भारतले चाह्यो भने तराईको समस्या दुई मिनेटमा समाधान हुन्छ पनि भन्नुहुन्थ्यो । उहाँले त्यो ग्य्राण्डडिजाइनबारे नेपाली जनतालाई कहिल्यै खुलस्त पार्नु भएन तर उहाँ स्वयं नै ग्य्राण्ड डिजाइनको गोटी बनेर उपयोग हुनुभएको कुरा भने घटनाक्रमले नै सिद्ध गर्दैआएका हुन् । नेपाली जनताको माग र अभिमतविना नै नेपालमा गणतन्त्र, संघीयता र धर्मनिरपेक्षताको  प्रक्षेपण उहाँकै नेतृत्वमा भएको थियो । अहिले नेपालको राष्ट्रिय एकता, अखण्डता र सामाजिक, क्षेत्रीय, जातिय एवं धार्मिक–सांस्कृतिक सद्भाव र सहिष्णुताविरुद्धका सुनियजित गतिविधिहरूको बीज त्यही नै हो । जानेर नजानेर त्यो बाटोमा हिँडेका राजनीतिक नेताहरूले एक दशकको अन्तरालमा पनि आन्तरिक राजनीतिक व्यवस्था गर्न सकेका छैनन् र अझै पनि बाहिरी शक्तिको आशीर्वाद खोज्ने र त्वंशरणम् गर्ने प्रवृत्ति त्यागेका छैनन् । अहिले राष्ट्रिय संकट घनीभूत हुँदैजानुको मूल कारण त्यही नै हो ।

अहिले देशमा उत्पन्न भएको अराजकता, विप्लव र बिद्रोहका प्रयोजित रुपहरूमा संघीयताको संरचनामा केन्द्रित जस्तो देखिएता पनि नेपाली जनतालाई एकआपसमा लडाएर भीडन्त गराइरहने र गृहयुद्ध, विखण्डन र विलयको नियतितिर डोर्याउने दीर्घकालीन योजनाअनुरूप नै यस्ता गतिविधिको प्रायोजन भैरहेको झलक देखिँदैछ । कैलालीदेखि तराईका विभिन्न जिल्लामा खुला सीमाको दुरुपयोग गर्दै प्रदर्शनमा सहभागी हुन दक्षिणतिरबाट अपराधकर्मीहरूको आयात भएको कुरा त गृहमन्त्री स्वयंले खुलाशा गर्नु सामान्य घटना होइन । सिक्किमको भारतमा विलय, पाकिस्तानको विखण्डन र श्रीलंकाको  विभाजनको मागसहितको  तामिल जातीय विग्रह एवं लामो गृहयुद्धका पछाडि कसको हात थियो र कस्ताकस्ता गतिविधिहरू प्रायोजित थिए भन्ने कुरा इतिहासमा अंकित छ र नेपालीहरूले ती प्रकरणबाट सधैं पाठ सिकिरहनु पर्दछ । सिक्किम विलयमा लेण्डुप दोर्जेको उपयोग भयो, पाकिस्तानबाट अलग बंगलादेश बनाउन मुक्तिबाहिनीहरूको निर्यात भयो भने श्रीलंकामा प्रभाकरणको नेतृत्वमा पृतकतावादी तामिलहरू  प्रशिक्षित र परिचालित भए । कैलाली र तराईका अन्य जिल्लामा देखिएका विद्रुपहरूले नेपाल दुर्नियतिको कुन चाहिँ बाटोतिर धकेलिँदैछ भन्ने गम्भिर प्रश्न खडा गरेको छ । कैलाली र तराईका विभिन्न जिल्लामा प्रायोजन भेरहेका घटनाबाट सवै देशभक्त नेपालीले पाठ सिक्नुपर्ने अवस्था आएको छ ।


Rating (Votes: )   
Share     Print


Other Articles:
मुलुक कता जाँदैछ ? नेताहरूले ख्याल गरुन् (08.26.2015)
छ प्रदेशको संघीयता (08.11.2015)
फेरि स्वामित्वकै प्रश्न (08.04.2015)
संविधान निर्माणको चटारो र राजनीतिक स्वामित्वको प्रश्न (07.28.2015)
मत संकलनको तामझाम (07.21.2015)
नीति तथा कार्यक्रम र बजेट (07.14.2015)
संविधानको मस्यौदा र उब्जिएका सवालहरू (07.07.2015)
सहयोगको ओइरो (06.30.2015)
सही बाटो पहिलिएला त ? (06.23.2015)
राहत सामग्रीमा भ्रष्टाचार (06.09.2015)
असामान्य अवस्थाको अन्त्य कसरी ? (06.02.2015)
वृहद राष्ट्रिय एकता अपरिहार्य (05.27.2015)
महाभूकम्पपछिको राष्ट्रिय सङ्कट (05.15.2015)
कहिले सुध्रने आर्थिक अवस्था ? (04.07.2015)
डा. के.सी.को अनशन र लुटतन्त्रको जालो (03.31.2015)
सीमासुरक्षाको सवाल (03.17.2015)
परिणामदायी वार्ताको खाँचो (03.10.2015)
अहिलेको यक्ष प्रश्न (03.04.2015)
प्रजातन्त्रको उपहास (02.24.2015)
विस्तारित हुँदैगएको राष्ट्रिय पीडा (02.17.2015)



 
::| Latest News

 
[Page Top]