युगसम्बाद साप्ताहिक
Yugasambad Saptahik
Monday, 12.18.2017, 11:44pm (GMT+5.5) Home Contact
 
 
::| Keyword:       [Advance Search]  
 
All News  
मुख्य समाचार
सम्पादकीय
दृष्‍टिकोण
आर्थिक
अन्तरर्वाता
विचार विवेचना
साहित्य भाषा
अन्तराष्ट्रिय
खेलकुद
कृति समीक्षा
अन्य समाचार
आजको समाचार
तस्वीरको बोली
दस्तावेज
विशेष रिपोर्ट
 
 
सम्पादकीय
 
संकीर्ण स्वार्थका नियोजित खेलहरू
Tuesday, 08.08.2017, 06:21pm (GMT+5.5)

देश अहिले कति नाजुक हालतमा पुगेको छ र सरकार जनताप्रति कति संवेदनहीन छ भन्ने कुराका अनेकौं उदाहरणहरू नियमित आकस्मिकताका रुपमा निरन्तर उजागर हुँदैआएका छन् । राजधानीभित्रै ढलमा डुबेर ससाना स्कूले नानीहरूले  ज्यान गुमाउनुपरेको घटनाको खाटो नबस्दै रौतहटको गरुडानगरपालिका ४ का चारजना नानीहरूले सडक निर्माण गर्दा बनाइएको खाल्डोमा डुबेर ज्यान गुमाउनुपरेको अर्को हृदयविदारक घटना सार्वजनिक भएको छ । नेपालमा सडकहरूको दुर्दशा देशव्यापी रुपमा विस्तारित छ र दुर्घटनाका अनेक दुःखद घटनाहरू बारम्बार दोहोरिने गरेका छन् । हालत सडकको दुर्दशामा मात्रै सीमित छैन– देशका हरेक क्षेत्रमा जनताप्रति उत्तरदायित्व बहन गर्ने शासकीय संस्कार नबसेकाले त्यसको दुष्परिणाम हरेक क्षेत्रले भोगिरहेको छ । सेवाग्राही नागरिकहरूले शिक्षा, स्वास्थ्य, खानेपानी, सार्वजनिक यातायातदेखि लिएर प्रत्यक्ष जनसरोकारका क्षेत्रमा उठाइरहनुपरेको कष्ट र पीडाको कुनै लेखाजोखा छैन । हरेक क्षेत्रमा निहितस्वार्थका संकीर्ण खेलहरू नियोजित रुपमा चलिरहेका छन् भने त्यस्ता असंगत खेलहरूको मूल मुहान राजनीतिक क्षेत्र नै रहेको छ । निर्माण क्षेत्रमा चलिरहेको ठेकेदारी प्रथाभित्र झ्यांगिएको भ्रष्टाचारले मूलतः राजनीतिक दलहरूकै संरक्षण पाउने गरेको छ । राजनीतिक दलका नेताहरूलाई केही रकम चन्दा दिएर काम हत्याउने, गुणस्तरीय काम पनि नगर्ने, निर्धारित समयमा काम पनि नगर्ने, उल्टै बिभिन्न बहानामा रकम बढाएर थप लाभ दोहन गर्ने र निर्माण कार्यमा चरम लापरवाही गर्ने प्रवृत्ति जता ततै झ्यांगिएको छ । राज्यबिहीनताको अनपेक्षित अवस्था विस्तारित हुँदैजानुको दुष्परिणतिकै उपज हो– रौतहटको गरूडा नगरपालिका–४ मा घटेको दुर्घटना पनि । निर्माण क्षेत्रमा व्याप्त लापरवाहीकै उपज हो त्यो ज्यानमारा घटना ।

सत्ताधारीहरू कति जवाफदेहिताविहीन र संवेदनहीन छन् भन्ने कुराको अर्को ताजा उदाहरण बनेको छ– डा. गोविन्स के.सी.को ११ औं पटकको आमरण अनशन । विगत १५ दिनदेखि आफ्नो जीवनलाई जोखिममा राखेर डा. के.सी. आमरण अनशनमा बसिरहनुभएको छ । उहाँ अनशन बस्नुको मूल कारण भनेको विगतमा सरकारले उहाँको अनशन तोडाउने क्रममा गरेका सम्झौताको कुनै कार्यान्वयन नहुनु नै हो । उहाँले उठाएका मुद्दाहरू आमजनसरोकारका विषयमा केन्द्रित रहेका र संकीर्ण स्वार्थमा केन्द्रित स्वास्थशिक्षाको व्यापारमा प्रत्यक्ष परोक्ष संलग्न हुनेहरू बाहेक सवै पक्षको विवेकसम्मत समर्थन रहेकाले सरकार उहाँको नैतिक बल र आत्मबलका सामु निरन्तर झुक्दैआएको भए पनि सहमति र सम्झौता कार्यान्वयन गर्ने पक्षमा सधैं उदाशिन देखिएको, इमान्दारिता नदेखाएको र निहित स्वार्थी समूहको प्रभावमा पर्ने गरेकाले समस्याको चूरो जहाँको तहीं छ । सरकारले अनशनरत  डा. के.सी.ले उठाउनुभएका मुद्दाहरू सम्बोधन गर्नकै लागि कुनै बेला त्रिभुवन विश्वविद्यालयका पूर्व उपकुलपति केदारभक्त माथेमाको नेतृत्वमा कार्य दल बनाएर एउटा नाटक मञ्चन गरेको थियो । माथेमा आयोगको प्रतिवेदन वास्तविकतामा आधारित भएको र त्यसलाई कार्यान्वयन गर्दा स्वास्थ शिक्षा र स्वास्थसेवाका क्षेत्रमा विकृतिहरू हट्दैजाने विश्वास पनि बढेको थियो । सोही क्रममा स्वास्थसेवाका क्षेत्रमा दरो जनविश्वास आर्जन गरेका डा. भगवान कोइरालाको संयोजकत्वमा  विज्ञटोली गठन गरी सरकारले नै वाञ्छित कानूनको मस्यौदा तयार गरायो तर त्यो मस्यौदाले स्वास्थ शिक्षा र सेवा क्षेत्रमा प्रभावी रहेको संकीर्ण स्वार्थी समूहको निहित स्वार्थमा धक्का पुग्ने देखेपछि राजनीतिक वृत्तमा समेत अनेक विसंगत खेलहरू चलिरहेकाले डा. के.सी. पुनः अनशनमा बस्नुभएको जगजाहेर नै छ ।  

आमरण अनशनमा ११ औं पटक बस्नुभएका डा.के.सी.को स्वास्थ दिन प्रतिदिन नाजुक बन्दैगएको छ र यो अहिले सचेत नागरिक समुदायबीच घोर चिन्ताको विषय बनिरहेको छ । उहाँले उठाएका मुद्दाहरूले विकेन्द्रित स्वास्थ शिक्षा प्रणाली र गरीब तर जेहेन्दारहरूको पक्षमा दरो वकालत गरेको र चिकित्सकहरूको ठूलो जमातले पनि खुला साथदिइरहेको तथ्य पनि उजागर भैरहेको छ । पूर्व प्रधानन्यायाधीश सुशीला कार्कीदेखि लिएर सचेत नागरिकहरूको ठूलो हिस्साले सडकमा नै उत्रिएर डा.के.सी.को जीवन रक्षाको माग गर्दै उहाँले उठाएका जायज मागहरू अबिलम्ब पूरा गर्न आवाज उठाइरहेको छ । सरकारले डा.के.सी. संग वार्ता गर्न एउटा टोली बनाएको र चार–पाँच पटक वार्ता पनि भएको देखिए पनि झारा टार्ने प्रकृतिको अधिकारबिहीन र प्रभावकारिता नभएको सो वार्ता टोलीबाट कुनै परिणामदायी निचोड ननिस्किने प्रष्टै अवगत भएको छ । संसदको अधिवेशन चालू रहेको वर्तमान सन्दर्भमा राष्ट्रिय सरोकारको मुद्दा बनेको यो प्रकरणमा कुनै दवावमूलक छलफल भएको अनुभूत नहुनु र संसदमा विचाराधीन रहेको विधेयकलाई पनि संकीर्ण स्वार्थी समूहको निहित स्वार्थपूर्तिकै लागि उपयोग हुने गरी परिमार्जित गर्न कोशिश भैरहेको अनपेक्षित चर्चा हुन थाल्नुले समस्याको निराकरण जटिल बन्दैगएको आभास दिइरहेको छ । असंगत प्रवृत्तिले राज्यका हरेक अंलाई प्रदूषित बनाउँदै गैरहेको अहिलेको नाजुक अवस्थामा सर्वसाधारण नागरिकको जीवन रक्षाको प्रत्याभूति हुन नसकेको उदाहरण गरूडाकाण्डले दिइरहेको छ भने डा.के.सी.को जीवनमाथि भैरहेको खेलवाडले सत्ताधारीहरूको विवेक, उत्तरदायित्व बहन गर्ने क्षमता र संवेदनशीलता माथि नै गम्भीर प्रश्न उठाएको छ भन्नु सायद अत्युक्ति हुने छैन । सरकारले डा.के.सी.ले उठाएका मुद्दाहरूको तत्काल छिनिफनो गरोस् र उहाँको जीवन रक्षाका लागि अविलम्ब कदम चालोस् भन्ने हाम्रो आग्रह छ ।


Rating (Votes: )   
Share     Print


Other Articles:
आर्थिक समृद्धिको सपना मात्र (07.26.2017)
देखावटी आचारसंहिता (06.28.2017)
निर्वाचन सार्ने घातक निर्णय (06.22.2017)
राजनीतिक प्रदुषणको प्रभाव (06.15.2017)
सन्देहको निवारण होस् (05.31.2017)
सवै पक्षले मनन गर्नुपर्ने बेला (05.24.2017)
म्याक्रोनको जस्तै उदय नेपालमा कति सम्भव ? (05.17.2017)
उपलब्धिमूलक निर्वाचन (05.17.2017)
सन्निकट निर्वाचनको सार्थकता (05.11.2017)
निर्वाचनविरूद्ध असंगत चलखेल (05.02.2017)
नयाँ वर्षको शुभकामना (04.18.2017)
घोषित निर्वाचनको चुनौती (04.11.2017)
प्रधानमन्त्रीको चीन भ्रमण (03.22.2017)
गोविन्द गौतमको हत्या : सीमा अतिक्रमणको पीडा (03.14.2017)
कालो बादल हटेको छैन (02.28.2017)
शहीद दिवस : परम्पराको निर्वाहमा सीमित (01.31.2017)
राष्ट्रिय मार्गचित्रको अपरिहार्यता (01.18.2017)
पृथ्वीनारायण शाह र राष्ट्रिय एकता दिवसको सन्दर्भ (01.12.2017)
राष्ट्र रक्षाको अहं प्रश्न (01.04.2017)
आयातीत मुद्दाहरूको फन्दा (12.29.2016)



 
::| Latest News

 
[Page Top]