युगसम्बाद साप्ताहिक

ट्रम्पको कदम रोक्न प्यालेष्टाइनले कुटनैतिक दवाव दिने
Tuesday, 12.05.2017, 03:43pm (GMT5.5)

अमेरिकी राष्ट्रपति डोनाल्ड ट्रम्पले जेरुसेलमलाई इजरायलको राजधानीको मान्यता दिने कदम अगाडि बढाउँने तयारी गरेको भन्दै यस विरुद्ध कुटनैतिक रूपमा समर्थन जम्मा गर्न प्यालेष्टिनी नेताहरूले आइतबार प्रदर्शनको तयारी गरेका छन् ।
अन्तराष्ट्रिय सञ्चारमाध्यमले अमेरिकी राष्ट्रपति डोनाल्ड ट्रम्पले जेरुसेलमलाई इजरायलको राजधानीका रूपमा मान्यता दिने बिषयलाई आगामी बुधवार घोषणा गर्ने तयारी रहेको र अमेरिकी राजदूतावासलाई जेरुसेलम सार्नेबारे आगामी सोमबारसम्म निर्णय लिनसक्ने बताएका छन् । 
यसलाई लिएर प्यालेष्टिनी राष्ट्रपति महमद अब्वासले विश्व नेताहरूसँग फोनमार्फत् सल्लाह गरिरहनुभएको राष्ट्रपतिका कुटनीतिक सल्लाहकार माज्दी अल खालिदीले एएफ्पीलाई बताउनुभयो । राष्ट्रपतिले अहिलेसम्म फ्रान्सका राष्ट्रपति इमानुएल म्याक्राँे, टर्कीका राष्ट्रपति रेसेप तैयप एर्दोगान, अरब लिग तथा अर्गनाइजेसन अफ इश्लामिक कोअपरेसनका सदस्यसँग छलफल गरिसक्नुभएको खालिफीले बताउनुभयो ।
सूचना तथा सस्ंकृति विभागका प्रमुखसमेत रहनुभएकी आश्रावीले अमेरिकाले राजदूतावासलाई जेरुसेलम सार्ने कदमले समग्र यस क्षेत्रमा अस्थिरता निम्त्याउने, शान्ति प्रक्रियालाई खल्बलाउने, यस क्षेत्रमा अमेरिकी भूमिकालाई अयोग्य सावित गर्ने तथा अतिवादको नयाँ लहर सिर्जना गर्ने भनी शनिबार उक्त तयारीबारे विरोध जनाउनुभएको थियो ।
“मलाई विश्वास छ यस्तो कदम कसैले पनि लिने छैन । यो कदम अत्यन्तै गैरजिम्मेवार तथा खतरनाक सावित हुनेछ,” उहाँले भन्नुभयो । “राजदूतावास सार्ने कदम एकदम खतरनाक हुनेछ र धार्मिक बिषयका रूपमा उदाउने छ ।”  
यसैबीच अमेरिकी राष्ट्रपति डोनाल्ड ट्रम्पले आइतबार आफूले अमेरिकी संघीय गुप्तचर विभाग (एफबीआई) का पूर्व निर्देशक जेम्स कोमीलाई पूर्व अमेरिकी सुरक्षा सल्लाहकार मिखायल फ्लिनमाथिको अनुसन्धान अघि नबढाउन भनेको भन्ने भनाइको पुनः खण्डन गर्नुभएको छ ।
जेम्स कोमीले आफूले एफबीआईलाई झूटो विवरण दिएको भन्दै हालै माफी माग्नुभएको थियो । आइतबार ट्वीट गर्दै ट्रम्पले भन्नुभयोे, “मैले अनुसन्धान रोक्न कोमीलाई कहिल्यै भनिन । कोमीले झूटो बोलेको थप झूटा खबरले सञ्चारमाध्यममा स्थान पाएका छन् ।”
शनिबार अमेरिकी राष्ट्रपति ट्रम्पले सन् २०१५ मा भएको अमेरिकी निर्वाचनका क्रममा आफू र आफ्नो निर्वाचन अभियानले मस्कोसँग सहकार्य नगरेको दोहोराउनुभएको थियो । 
उहाँले उक्त आरोप आधारहीन भन्दै अमेरिकी न्याय विभाग र आफ्ना प्रतिद्वन्द्वी हिलारी क्लिन्टनलाई उल्टो आरोप लगाउनुभएको थियो ।


Copyright © 2011 Yugasambad Weekly (Yugasambad.Com.Np). All rights reserved. Powered By Neeraz.Com