आइतबार आतङ्ककारीद्वारा भएको आक्रमणमा परी १७ सेनाले ज्यान गुमाएका छन् । सैनिकको उत्तरी कमाण्डले सो जानकारी दिएको छ । यस आक्रमणको क्रममा उरीस्थित सेनाले गरेको जावाफी कारबाहीमा चार आतङ्ककारीको पनि मृत्युभएको छ ।

यस आक्रमणमा १७ सैनिकले आफ्नो बलिदान दिएको सैनिकको उत्तरी कमाण्डद्वारा ट्वीटरमार्फत जानकारी दिएको छ । भारत अधिनस्थ काश्मिरको प्रमुख सहर श्रीनगरबाट एक सय किलोमिटर पश्चिममा यस उत्तरी क्षेत्र पर्ने बताइएको छ । 

आक्रमणपछि भारतीय प्रधानमन्त्री नरेन्द्र मोदीले भारत अधिनस्थ कश्मिरमा सरकारी सेनामाथी भएको आक्रमणको कडा शव्दमा निन्दा गर्नुभएको छ । “क्रुर आतङ्ककारीहरूद्वारा काश्मिरमा गरेको घृणित घटनाको हामी कडा शव्दमा निन्दा गर्दछौं र घटनाका दोषीलाई कुनैपनि हालतमा कडा कारवाही गरी छाड्ने अठोट पनि व्यक्त गर्दछु ।” मोदीको ट्विटरमा लेख्नुभएको बताइएको छ  । 

उता पश्चिम पाकिस्तानी सहर पेसावरमा अज्ञात बन्दुकधारीले गरेको आक्रमणमा तीन सैनिकको मृत्यु भएको पाकिस्तानी प्रहरीले जानकारी दिएको छ । 

प्रहरी अधिकारी साउकात खानका अनुसार आइतबार बिहान निजी सवारी साधनमा अज्ञात बन्दुकधारीले गरेको आक्रमणमा परी तीन सैनिकको मृत्यु भएको छ । 

खानका अनुसार आक्रमणकारी मोटरसाइकलमा त्यहाँबाट भागेका थिए । आक्रमणकारीको खोजीकार्य जारी रहेको प्रंहरीले जानकारी दिएको छ । यस आक्रमणको हालसम्म कुनै पनि समूहले जिम्मा लिएको छैन् । तर यसप्रकारको आक्रमणमा इस्लामिस्ट स्टेट (आइएस) आतङ्ककारी  समूहको सहभागिता रहँदै आएको  छ ।