युगसम्बाद साप्ताहिक
Yugasambad Saptahik
Tuesday, 10.15.2019, 07:03pm (GMT+5.5) Home Contact
 
 
::| Keyword:       [Advance Search]  
 
All News  
मुख्य समाचार
सम्पादकीय
दृष्‍टिकोण
आर्थिक
अन्तरर्वाता
विचार विवेचना
साहित्य भाषा
अन्तराष्ट्रिय
खेलकुद
कृति समीक्षा
अन्य समाचार
आजको समाचार
तस्वीरको बोली
दस्तावेज
विशेष रिपोर्ट
 
 
अन्तरर्वाता
 
राष्ट्रका लागि जसले बलिदान गरेको छ, राष्ट्रियताको मुद्दामा अर्कोले पछि पा¥यो - नवीन्द्रराज जोशी
Tuesday, 12.11.2018, 01:28pm (GMT+5.5)

० नेपाली कांग्रेस विधान संशोधनभन्दा गुटगत छलफलमै बढी केन्द्रित भएको देखियो नि ?
कुन कुरामा सहमति, कुनमा असहमति भिन्नै प्रशंग हो । तर, खुला बहस गरेका छौं । सबैले प्रस्तावनादेखि नै आ–आफ्नो दृष्टिकोण राख्यौं । मस्यौदा समितिका साथीहरुले दशैंतिहार नभनी मेहनत गर्नुभएको छ । मलाई के लाग्छ भने फरक दृष्टिकोणको बहसबाट कांग्रेस अगाडि बढ्दा क्रियाशील सदस्यहरु साँच्चीकै क्रियाशील हुन्छन् । साथीहरुको मूल्यांकन हुन्छ र पार्टी पद्दतिअनुसार चल्छ ।

० पहिला सभापति निकट समूह पदाधिकारी संख्या बढाउनुपर्छ भन्थे, अहिले तपाईहरु बढाउनुपर्छ भन्दै हुनुहुन्छ, खास कुरा के हो ?
मलाई धेरै साथीहरुले धेरै प्रश्न पनि गरे । जिल्लाहरुबाट पनि पदाधिकारी संख्या किन बढाउनुपर्छ भन्नुहुन्छ भनेर सोधे । यसमा मेरो कुरा ‘क्लियर’ छ । कांग्रेसले निर्वाचनका बेला आफ्ना सबै संयन्त्रलाई पूर्णरुपमा सञ्चालन गर्न सकेन, अनुशासित रुपमा परिचालन गर्न सकेन । समाजमा निरन्तररुपमा खट्नुपर्ने कार्यकर्तालाई खटाउन सकेनौं । पार्टी संगठनमा कहाँ, के कमी भयो हेरविचार गर्न सकेनौं । भ्रातृ संगठनहरु के गरिरहेका छन्, के समस्या छ भन्ने हेरेनौं । कार्यकर्तालाई प्रशिक्षित गर्न सकेनौं । मैले देखेको समस्या हुन् यी ।
अब एउटा उपसभापतिले प्रशिक्षण विभाग चलाउनुस्, अर्कोले अनुशासन र अर्कोले सामाजिक परिचालन हेर्नुस् । महामन्त्री पनि तीनजना राखौं । एउटाले संगठन हेर्नुस्, अर्कोले भ्रातृ संगठन हेर्नुस्, अर्कोले अहिलेको राजनीति कता गएको छ, अरु दल के गर्दैछन् विश्लेषण गर्नुस् ।
जसले राष्ट्रका लागि बलिदान गरेको छ, उसलाई राष्ट्रियताको मुद्दामा अर्कोले पछि पा¥यो । भारतका तत्कालीन प्रधानमन्त्री नेहरुले नेपाललाई केही प¥यो भने हामी सहयोग गर्छौ भन्दा वीपीले भन्नु भएको थियो, माफ गर्नुहोला, प्रधानमन्त्रीज्यू, नेपाल आफ्नो सुरक्षा गर्न आफैं सक्षम छ । यो ठूलो च्यालेञ्ज थियो । यस्तो पार्टीलाई अर्कोले उखान टुक्का जोडेर के–के भन्यो भन्यो । खै त पार्टीले त्यसको खण्डन गर्न सकेन, भ्रमपूर्ण प्रचार चिर्न सकेन । त्यसैले, राजनीतिक दलका रुपमा काम गर्न हामीले यसमा ध्यान दिनुपर्छ ।
सहमहामन्त्री पनि तीनजना राखौं । किनभने भोलि कांग्रेसको नेतृत्वमा आउन चाहनेले काम गर्ने, ट्रेनिङ लिने ठाउँ होस् । उसले सभापति, उपसभापति र महामन्त्रीहरुसँग मिलेर धेरैभन्दा धेरै काम गरोस् र सिकोस् पनि ।
यो सँगसँगै नेता व्यवस्थापन पनि होस् । किनभने कांग्रेसमा लागेकाहरुको साह्रै अव्यवस्था भयो । सारा जीवन पार्टीमा लगाएको छ, आफ्नो जीवनमा आएको अरु सबै अवसर गुमाएको छ । अनि भोलि के गर्ने भन्ने निराशामा बस्नुपर्ने अवस्था नहोस्, सबै नेता कार्यकर्ताको संरक्षण होस् । पद नै दिनुपर्छ भन्ने होइन तर, राजनीतिक सम्मान दिनुपर्छ । त्यसैले पदाधिकारी बढाउनुपर्छ भनेको छु ।

० कांग्रेसको अहिलेको समस्या पदाधिकारी संख्या नपुग्नु हो र ? विधानमा भएकै पदहरुमा मनोनयन गर्न दुई वर्षभन्दा बढी लाग्यो । विभागहरु अझै बनेकै छैनन् ।
म विगतमा जान्नै चाहन्न । इतिहास हाम्रो गौरव हो, त्यही जगमा उभिएका छौैं र भविश्यतिर हेरिरहेको छु । तपाई आफैं भन्नुस् न, चुनावका बेला उपसभापति भएको भए राम्रो हुन्थ्यो होला नि । महामन्त्री भएको भए राम्रो हुन्थ्यो होला नि । विभाग बनेको भए ५०० मान्छे त सक्रिय हुन्थे होला नि । फरक पर्छ, किन नपर्नु ? तर, म फेरि पनि भन्छु, म विगततिर जान चाहन्न । भविश्यमा गौरव गर्ने पार्टीका रुपमा कांग्रेसलाई स्थापित गर्न चाहन्छु ।

० तर, तपाईले पदाधिकारी बढाउनुपर्छ भन्नुको कारण भोलि रामचन्द्र पौडेल सभापतिको उम्मेदवार हुँदा सबै नेतालाई व्यवस्थापन गर्न सकियोस् भनेर हो । देउवा पक्षले बढाउनुहुन्न भन्नुको कारण पनि पौडेल क्याम्पमा नेता व्यवस्थापन नहोस् र आफू सहजै चुनाव जितेर आउन पाउँ भनेर हो भन्छन् नि ?
मेरो दृष्टिकोण मैले तपाईंलाई भनें, यसमा म प्रष्ट छु । अब नेताहरुले आ–आफ्नो कुरो त गरिराख्छन् ।

० तर, नेताहरुको त्यही कुरा तपाईमार्फत व्यक्त भएको हो कि ?
नेताहरुको व्यवस्थापन हुन्छ भने के बिग्रियो त ? हाम्रा अग्रज नेताहरु, जसले पार्टीका लागि समय दिएका छन्, त्याग गरेका छन्, उनीहरुको सबैको व्यवस्थापन भयो त के बिग्रियो ? मेरो कुनै पूर्वाग्रह छैन ।
० दुबै पक्षबाट विधानमा के व्यवस्था राख्दा आसन्न १४ औं महाधिवेशनमा आफूलाई अनुकुल हुन्छ भन्ने पनि हेरियो भन्छन् नि ?
राजनीति गर्नेले आफ्नो अनुकुलता पनि हेर्छन्, म यसलाई पुरै अस्वीकार गर्दिनँ । तर, मैले मूलरुपमा कुन अधिवेशन आउँदैछ भन्दा पनि भोलि कांग्रेसले राष्ट्रलाई नेतृत्व दिनसक्ने परिस्थिति कसरी बन्न सक्छ र कांग्रेसका कार्यकर्ताले समाजमा कसरी सम्मानित महसुस गर्न सक्छन् भन्ने हेरेको छु ।
० तर, रामचन्द्र पौडेल समूहले देउवा फेरि सभापति हुने नै भए, रोक्न नसकिने भयो भनेर एक प्रकारले अहिले नै हार स्वीकार गरेको जस्तो देखियो । विधान संशोधन गर्दा कसरी रोक्न सकिन्छ भनेर हेरियो भन्छन् नि ?
मिडियामा के–के आएको छ, मलाई थाहा छैन । तर, मेरो दृष्टिकोणमा को सभापति हुने भन्दा पनि सभापति कस्तो हुनुपर्छ र कसरी अगाडि बढ्नुपर्छ भन्ने हो । सभापति त सबैको हो, उहाँले सबैलाई समेटेर अगाडि बढ्नुपर्छ । नियुक्त गरेको मान्छे आफ्नो हुने, चुनावबाट आएको नहुने भन्ने थाल्यो भने बर्बाद भइहाल्यो नि ।
पार्टीभित्र पक्ष–विपक्ष हुन्छ, आआफ्नो दृष्टिकोण राख्छन् । राजनीति गर्न आएका हौं, जनताको भलो गर्छु भनेर आएको हो, उसले आफ्नो दृष्टिकोण त राख्छ राख्छ । नेताले चित्त बुझाउँछ, बुझाउँदैन दोस्रो कुरा हो । त्यसैले कसको पक्ष र विपक्षमा भन्ने मुख्य होइन । होला, कहीँ न कहीँ कर्नरमा त्यसले पनि प्रभाव पारेको होला, त्यसलाई पूर्ण अस्वीकार गर्दिनँ ।
० पदाधिकारीपछि अर्को विवाद सदस्यतामा देखिन्छ । तपाईहरु चाहिँ अहिलेकै व्यवस्थाको पक्षमा ?
मैले अहिले भएको व्यवस्थालाई अझ व्यवस्थित बनाएर लैजानुपर्छ भनेको छु । मेरो प्रस्तावअनुसार सदस्य वा अहिले जस्तै साधारण सदस्य र क्रियाशील सदस्य रहन्छन् । अहिलेसम्म भएका क्रियाशील सदस्य अन्यथा (पार्टी छाडेका) बाहेक स्वतः क्रियाशील सदस्य नै हुने भए । नयाँको हकमा कांग्रेसको सदस्य बनेर दुई वर्ष काम गरेपछि मात्र क्रियाशील सदस्यत हुन पाइन्छ ।
फेरि क्रियाशील सदस्यबारे केन्द्रले होइन, वडाले निर्णय गर्नुपर्छ । यो–यो सदस्य क्रियाशील छन्, उनीहरुलाई अब क्रियाशील सदस्य बनाउनुपर्छ भनेर वडाले सिफारिस गर्छ । त्यसको जानकारी सबै सदस्यलाई दिइन्छ र माथिल्लो समितिले अनुमोदन गर्छ ।
बुझ्नुपर्ने एउटा कुरा के छ भने कांग्रेसमा क्रियाशील सदस्यता नै हाम्रा मतदाता हुन् । त्यसैले यसमा चलखेल हुने सम्भावना रहन्छ । त्यसलाई न्यून गर्न को–को क्रियाशील सिफारिस भए सबैलाई जानकारी दिने र दिनुपर्नेलाई दिइएन वा दिन नहुनेलाई दिइयो भने उजुरी गर्न पाइने व्यवस्था राखौं भनेको छु ।
० कांग्रेसको हरेक महाधिवेशनमा राजनीतिक विषयभन्दा बढी विवाद क्रियाशील सदस्यतालाई लिएर हुन्छ । तपाईको प्रस्तावले यसलाई सम्बोधन गर्छ त ?
पूर्ण सम्बोधन गर्छ त म भन्न सक्दिनँ । समस्यालाई न्यून बनाउने गरी हामीले यो प्रस्ताव ल्याएका छौं । अब क्रियाशील सदस्यता पार्टीमा निरन्तर चलिरहने प्रक्रिया हुन्छ । हिजो जब अधिवेशन आउन लाग्यो, क्रियाशील लिने–दिने हुन्थ्यो । अब साधारण सदस्य भएको २ वर्षमा मात्र क्रियाशील सदस्यता पाइन्छ ।
० केही नेताले भनेजस्तो सदस्यलाई क्रियाशील सदस्य चुन्न दिनचाहिँ किन सकिँदैन ?
कांग्रेस ‘मास बेस पार्टी’ हो । सदस्यतामा हामी सबैलाई आकर्षित गर्ने प्रयास गर्छौं, तर ‘मास’ लाई परिचालन गर्ने भूमिका क्रियाशील सदस्यकै हुन्छ । मानौं, तपाई कांग्रेसको सदस्य हुनुभयो र तपाईलाई केही अप्ठ्यारो र्पयो भने दौडिने क्रियाशील हुन्छ । सबैमा दायित्व प्रदान गर्दा कसैमा पनि दायित्व नरहने स्थिति नहोस् । म राजनीति गर्छु भन्ने मान्छेलाई कहीँबाट थुनछेक हुन नसकोस् ।
० विधानको मूल प्रस्तावमा भनिएजस्तो सदस्य मात्रै भन्ने र उनीहरुमध्येबाट केहीले मतदानको अधिकार पाउने हुँदा तपार्ईले भनेको जस्तो गर्न कहाँनिर अफ्ठ्यारो पर्छ ?
हामी अहिले नै त्यो सिस्टममा जान सक्दैनौं । किनभने हाम्रो राजनीति र समाजको मूल्यमान्यता हेर्दा कसैले सदस्यता लिन लगाएर आफू चाहेको पदमा आउन सक्छ । बरु हाम्रो प्रस्ताव अनुसार जाने हो भने धेरैभन्दा धेरै क्रियाशील सदस्य हुन सक्छन् । फेरि कांग्रेस ठूलो संघर्ष गरेर आएको ऐतिहासिक पार्टी हो, यसका निश्चित मूल्य मान्यता छन् । पार्टी संरचनाबारे बहस गर्दैगर्दा यो पनि सोच्नुपर्छ ।
० सभापति शेरबहादुर देउवाले महाधिवेशन अगाडि भटाभट क्रियाशील सदस्यता बाँडेर भोट बढाउने डरले तपाईहरुले यो प्रस्ताव ल्याउनुभयो भन्छन् नि ?
डर होइन, निश्पक्ष होस् भन्ने चाहना हो । कसैले सिस्टम दुरुपयोग नगरोस् भन्ने हो ।
० तपाईहरुले अहिलेको नेतृत्व पद्दतिमा हिँडेन भन्दै आउनुभएको हो । भनेपछि कहीँ न कहीँ डर त छ नि ?
नेतृत्व पद्दतिमा चल्नुपर्छ, संस्थागतरुपमा पार्टी सञ्चालन गर्नुपर्छ । विधान पालना त माथिल्लो मात्र होइन, तल्लो हतको नेतृत्वले पनि गर्नुपर्छ ।


Rating (Votes: )   
Share     Print


Other Articles:
हामी सबैलाई प्रधानमन्त्री बनाए हुने गरी भाषण गर्नसक्ने बनेका छौं - पूर्व अर्थमन्त्री सुरेन्द्र (11.20.2018)
खाना, नाना र छानायुक्त प्रजातन्त्र नेपाली जनतालाई आवश्यक छ- प्रधानमन्त्री ओली (10.02.2018)
पत्रकारितामा पञ्चायतकाल बिर्साउने क्षण आयो- शम्भु श्रेष्ठ, सम्पादक दृष्टि साप्ताहिक (09.25.2018)
“ओली सरकार जुद्धशम्शेरपछि सबैभन्दा शक्तिशाली सरकार हो” - गगन थापा (05.30.2018)
हजारौंलाई कालसंग खोस्ने डा. देवकोटा आफैं कालसंग लड्दै (05.08.2018)
जनताले अग्रभागमा रहेका नेता को कस्ता भनेर चिनिसकेका छन्- विष्णु पौडेल (04.24.2018)
नेपाली राजनीतिमा प्रचण्डले तरङ्ग नल्याए मोनोटोनस जस्तो हुन्छ- जनादर्शन शर्मा (04.03.2018)
रेल ल्याउनुअघि रेल पढ्ने ब्यवस्था गर्नुस् (03.27.2018)
विद्युत चोरीबाट मात्रै १०–१२ अर्ब रुपैयाँ घाटा भैरहेको छ - कुलमान घिसिङ (02.20.2018)
ओली आफ्नो राष्ट्रवादी एजेण्डा छाड्नुहोला जस्तो लाग्दैन (01.30.2018)
“जनताले धेरै कुरा बुझेका रहेछन्” - कृष्णप्रसाद दाहाल (12.19.2017)
नेपालले पानी नदिने हो भने भारत प्याक प्याक भएर मर्छ : कीर्तिनिधि विष्ट (11.15.2017)
एउटै बाटोबाट मात्र लक्ष्यमा पुगिन्छ भन्ने छैन- डा. बाबुराम भट्टराई (10.11.2017)
माओवादीसंग मिलेर एमालेलाई सिध्याउने कि आफू सिद्धिने हो ? (09.12.2017)
निर्वाचन आयोग अहिले आइसीयुमा छ (09.06.2017)
म आपराधिक प्रवृत्ति, षड्यन्त्रकारी र आत्मसमर्पणवादीको घेराभित्र थिएँ (08.15.2017)
फेरि लोडसेडिङ हुँदैछ भन्ने आशंका बढ्दैछ : कुलमान घिसिङ (08.08.2017)
सुखको खोजीमा मात्र हिंड्यो भने त्यसले कर्मलाई आफंै पर धकेलिदिन्छ (07.26.2017)
पार्टी खोलेर मात्रै हुँदैन एजेण्डा पनि सही हुनुप¥यो– अनिता यादव (06.28.2017)
सबै ठीकठाक भए ८० दिनमा चुनाव गरिन्छ (02.28.2017)



 
::| Latest News

 
[Page Top]