युगसम्बाद साप्ताहिक
Yugasambad Saptahik
Tuesday, 12.18.2018, 11:41pm (GMT+5.5) Home Contact
 
 
::| Keyword:       [Advance Search]  
 
All News  
मुख्य समाचार
सम्पादकीय
दृष्‍टिकोण
आर्थिक
अन्तरर्वाता
विचार विवेचना
साहित्य भाषा
अन्तराष्ट्रिय
खेलकुद
कृति समीक्षा
अन्य समाचार
आजको समाचार
तस्वीरको बोली
दस्तावेज
विशेष रिपोर्ट
 
 
कृति समीक्षा
 
“वाफको पर्दा”भित्र पसेर हेर्दा
Monday, 03.26.2012, 03:29pm (GMT+5.5)

“वाफको पर्दा” स्रष्टा पोषरमण चापागाईको पछिल्लो निबन्धात्मक कृति हो । निबन्ध, कथा, बालकथा र नियात्रा जस्ता अनेक विधामा गरी हालसम्म उहाँका दश कृति प्रकाशित भैसकेका छन् । तीन दशकभन्दा लामो समयदेखि त्रिभुवन विश्वविद्यालयको सेवामा रही नेपाली भाषा–साहित्य शिक्षणमा संलग्न रहनुभएका स्रष्टा चापागाईको निबन्ध लेखनको भाषा शैली मौलिक प्रकृतिको छ । आफूले देखे–भोगेका र अनुभूत गरेका कुनै पनि विषयलाई हृदग्राही चित्रमय शैलीमा प्रस्तुत गर्नुसक्ने क्षमता सर्जक चापागाईमा छ । उहाँको पछिलो निबन्ध संग्रह ‘वाफको पर्दा’ परम्परागत शैलीमा लेखिएका निबन्धहरूभन्दा भिन्न शैली अपनाएर पाठकहरूको मन आकर्षत गरेको छ । उहाँका निबन्धमा स्थानगत विशिष्टताको सजीव चित्रण, आत्मगत अनुभूतिका छचल्किएको भावलहरी र समयचेत बोधी विचार प्रवाहको त्रिवेणी छ । निजात्मक अनुभूतिलाई सार्वजनिकीकरण गरेर सहृदयी पाठकसंग भावनात्मक सम्बन्ध जोड्नसक्ने क्षमता निबन्धकारले विकसित गर्दैगएको देखिन्छ ।

‘वाफको पर्दा’मा उनन्तीसवटा निबन्धहरू संग्रहित छन् । नियात्रा खण्ड र निबन्ध खण्ड गरी दुई खण्डमा विभाजित रचनाहरूले उहाँको निबन्ध लेखनको निजात्मक शैलीसंग साक्षात्कार गराएका छन् । नियात्रा खण्डमा नेपाल र भारतका सांस्कृतिक, धार्मिक महत्वका विविध क्षेत्रको भ्रमण गर्दाको पृष्ठभूमि, यात्रा प्रबन्ध र यात्रा गर्दाको अवस्था र परिस्थितिजन्य अनुभूतिलाई विभिन्न उपशीर्षक दिएर प्रस्तुत गरिएका नौवटा लेख रचनाहरू समाविष्ट छन् भने निबन्ध खण्डमा सामसामयिक विषयवस्तुमा केन्द्रीत, समयचेतले ओतप्रोत भएर रचिएका बीसवटा निबन्धहरू समावेश गरिएका छन् ।

नियत्रा खण्डका निबन्धहरूले यात्रास्थलको सूक्ष्म परिचय दिनुका साथै प्रकृतिप्रेम, सांस्कृतिक प्रेम र राष्ट्रप्रेमको भावलहरी पनि उठाउनुभएको छ । लेखकको भ्रमणप्रिय स्वभावले यात्रानुभूतिको संवेदनालाई सजीव ढङ्गले प्रस्तुत गर्न प्रेरित गरेको छ । उहाँको निजात्मक शैलीभित्र उत्तिकै कलात्मकता छ । जीवनको मूल्यलाई मानवीय चेतनाले ओतप्रोत गर्न अभिप्रेरित छन् । एउटै निबन्धलाई विभिन्न उपशीर्षक दिएर कतै अति छोटा र कतै लामा अनुच्छेदमा विषयवस्तु प्रस्तुत गर्ने उहाँको कला समसामयिक निबन्ध लेखनशैलीभन्दा नितान्त भिन्न र मौलिक छ । उहाँको प्रयोगपरकता– ‘हाइकु निबन्ध’को प्रयोगपरकता र सैद्धान्तिक मान्यता स्थापनातर्फ केन्द्रीत छ ।

निबन्धकारले जीवनका विविध पक्षलाई अनुभवजन्य धारणाका रुपमा प्रस्तुत गरेर अभिव्यञ्जित गर्नुभएको छ । निबन्धहरूमा कतै नितान्त वैयक्तिक, कतै सामाजिक र राजनीतिक, कतै सांस्कृतिक विषयवस्तु छचल्किएका छन् भने कतै आध्यात्मिक, कतै प्रकृतिप्रेमको संमोहन छचल्किएको छ । उहाँका निबन्धहरू चेतनाबोधी भएकाले समाजोपयोगी छन् । स्रष्टाको प्रयोगपरकताले नेपाली निबन्ध लेखनको नयाँ शैली वरण गरेको छ । ‘वाफको पर्दा’ पठनीय निबन्ध संग्रह हो ।

२०६८ वैशाखमा प्रकाशित २०० पृष्ठको यो निबन्ध संगैहको भूमिका लेखन प्रा.डा. अभि सुवेदी र प्रा. राजेन्द्र सुवेदीले गर्नुभएको छ भने सम्पादन हरि मञ्जुश्री र प्रकाशन अक्सफोर्ड इन्टरनेशनल पब्लिकेशनले गरेको छ । कृतिको मूल्य रु २१०।– छ ।
– घिमिरे



Rating (Votes: )   
Share     Print


Other Articles:
खनालको पत्रकारिता सन्दर्भ : देवराज अर्याल (03.12.2012)
दुई भाषामा एकांकी नाटक “भृकुटीको विवाह” (12.13.2011)
समालोचना संग्रह : "केही प्रतिभा केही प्रवृत्ति" (08.15.2011)



 
::| Latest News

 
[Page Top]