काठमाडौं । देशकै सबैभन्दा जेठो र सर्वसाधारण जनतालाई सर्वाधिक बढी स्वास्थ्य सेवा प्रदान गर्ने वीर अस्पताल यतिबेला भौतिक र प्रशासनिक दुवै रुपबाट जर्जर बन्न पुगेको छ । यतिबेला वीर अस्पतालमा आवश्यक चिकित्सक र कर्मचारीका अभावले सबै सेवा बन्द हुने अवस्थामा पुगेको छ । अस्पतालले ८ वर्षदेखि स्थायी कर्मचारी र चिकित्सक नियुक्त गर्न नसकेको त्यहाँ कार्यरत कर्मचारीहरू बताउँछन् । यसैबीच स्वास्थ्य मन्त्री राजेन्द्र महतोले गत विहिबार वीर अस्पतालको निरीक्षण गरी अस्पतालको अवस्था देखेर अस्पतालका पदाधिकारीलाई तत्काल सुधार थाल्नु भन्दै हकार्नुभएको समाचार आयो । वीर अस्पतालको हालत वर्षौं प्रयोगमा नआएको कोठाजस्तो देखिन्थ्यो । बिरामीको बेडमाथि माकुराको जालो, ढल फुटेको, आकस्मिक प्रयोगशालाको भित्तामा पानी रसाइरहेको दृश्य देखेपछि मन्त्री महतोले यी काम गर्न कति करोड चाहिन्छ भन्दै अस्पताल पदाधिकारीहरूको सातो खानुभएको थियो । उहाँले सात दिनभित्र अस्पतालमा सुधारको कामका लागि ठोस प्रस्ताव नल्याए मन्त्रालयले आवश्यक कदम चाल्ने चेतावनी समेत दिनुभयो ।

अवाञ्छित राजनीतिकरणबाट कारण र चिकित्सकहरूको व्यापारिक मानसिकताका थिलथिलो भएको अस्पतालले अत्यावश्यकीय सेवा समेत पु¥याउन सकिरहेको छैन । भएका उपकरणको मर्मत नगर्ने, मर्मतको नाममा लाखौं भ्रष्टाचार गर्ने, कर्मचारी यूनियनको अवाञ्छित चलखेल आदिले अस्पताल आफैं पक्षघातको शिकार हुन पुगेको छ । एउटा पक्षले गरेको नियुक्ति अर्कोलाई चित्त नबुझ्ने र सर्वसम्मत कोही हुनै नसक्ने भएपछि वर्तमान निर्देशक डा. बुलन्द थापालाई हटाउन कर्मचारी यूनियन लागिपरेको छ । त्यसो त डा. थापाले कुनै कार्यकुशलता देखाएको उदाहरण छैन । उहाँ पनि कुनै शक्तिकेन्द्रकै इशारामा नाचिरहनुभएको अस्पतालका इमान्दार कर्मचारीहरू बताउँछन् ।

अस्पताललाई चाहिने जनशक्ति भर्नामा समेत राजनीति हुने हुँदा अस्पताल आवश्यक जनशक्ति पूर्ति गर्न समेत असमर्थ रहेको छ । यसअघि अस्पतालका निर्देशक डा.बुलन्द थापाले अनावश्यक रूपमा करारमा ९१ जना कर्मचारीहरू नियुक्ति गरेको भन्दै अख्तियार दुरुपयोग अनुसन्धान आयोग र राष्ट्रिय शतर्कता केन्द्रमा उजुरी परेपछि शतर्कता केन्द्रले अस्पताल प्रशासनलाई नियुक्ति बदर गर्न निर्देशन दिएको थियो । सो अनुसार ३६ जना चिकित्सक ७ स्टाफ नर्स, १४ ल्याब टेक्निसियन, २ फिजिलो थेरापिष्ट, ३ रेडियो ग्राफर लगायतलाई हटाइएको थियो । यतिबेला २४ चिकित्सक आवश्यक रहेको इमर्जेन्सी शाखा ६ जना चिकित्सकको भरमा सञ्चालन भइरहेको छ समाचार छ । हाल वीर अस्पतालमा चिकित्सा विज्ञान राष्ट्रिय प्रतिष्ठानका तर्पmबाट ५ सय ३५ र नेपाल सरकारको तर्पmबाट ६ सय ३६ जना चिकित्सक, कर्मचारी, ज्यालादारी, करार र स्थायी रूपमा कार्यरत छन् । अस्पतालमा दैनिक २ हजारभन्दा बढी बिरामी उपचारका लागि आउने गरेका छन् ।