काठमाडौं । सरकारले सेना समायोजनका लागि पुनःवर्गीकरणको काम थाल्ने अघिल्लो दिन गत मंलगलबार एकीकृत नेकपा माओवादीका वरिष्ठ उपाध्यक्ष मोहन वैद्य किरणले समायोजन प्रकृयामा सहभागी नहुन अपील गर्नुभयो । त्यसपछि पुनःवर्गीकरण प्रकृया भाँडिने हो कि भन्ने चिन्ता व्यक्त भए पनि वैद्य पक्षले शान्ति प्रक्रिया टुंग्याउने काममा आफूहरूले अवरोध नगरेको तर समायोजनले जनमुक्ति सेनाको अपमान गरेका कारण समायोजनमा नगएर स्वेच्छिक अवकाशमा जान मात्र भनेको स्पष्ट पारेको छ । वैद्यको विज्ञप्तिको मिश्रित प्रभाव परेको छ । अधिकांश लडाकुहरू समायोजन र स्वेच्छिक  अवकाशमा गएका छन् । उनीहरूको रोजाईमा पुनःस्थापना प्राथमिक विषय बनेको पाइएन ।
सूत्रहरूका अनुसार समायोजनमा गए पनि स्वेच्छिक अवकाश लिएर पुनःस्थापित भए पनि एउटा प्रक्रिया सकिने देखिन्छ । तर यसले भविष्यमा उत्पन्न गर्नसक्ने समस्याको आँकलन भने कमैले मात्र गरेका छन् । वैद्य पक्षले “अपमानजनक ढंगले गरिने समायोजन प्रकृयामा सहभागी नहुन” अपील गरेको र पुनः वर्गीकरण प्रकृयामा अवरोध गर्न नभनेको स्पष्ट पारे पनि तोकिएको संख्याभन्दा धेरै लडाकु पुनःस्थापनामा गए भने वैद्य पक्षले उठाउँदै आएको जनविद्रोहको धार सशक्त हुने देखिन्छ । राजनीतिक रुपमा उनीहरूले शिविरमा रहेका लडाकुहरूको भावनालाई आत्मसात गरेको देखिए पनि समायोजनमा नजान गरिएको अपील कति लडाकुले मान्छन् भनेर अहिल्यै अनुमान गर्न गाह्रो छ । अर्कोतिर वैद्य पक्षको पार्टीभित्रको हैसियत पनि यो प्रकरणले स्पष्ट पारेको छ । संविधान संशोधन प्रस्ताव फिर्ता गराउन वाध्य पार्न सक्षम भएको वैद्य पक्षले लडाकुको समायोजन कार्यलाई पनि आफू अनुकूल बनाउन सक्दैन भनेर भन्न सकिन्न । सुरुवाती अवस्था रहेका कारण वैद्य पक्षको अपीलको मिश्रित नतिजा देखिए पनि आगामी दिनमा यसको प्रभाव कस्तो पर्ने हो ? यसै भन्न सकिने स्थिति छैन ।