युगसम्बाद साप्ताहिक
Yugasambad Saptahik
Monday, 10.23.2017, 04:06am (GMT+5.5) Home Contact
 
 
::| Keyword:       [Advance Search]  
 
All News  
मुख्य समाचार
सम्पादकीय
दृष्‍टिकोण
आर्थिक
अन्तरर्वाता
विचार विवेचना
साहित्य भाषा
अन्तराष्ट्रिय
खेलकुद
कृति समीक्षा
अन्य समाचार
आजको समाचार
तस्वीरको बोली
दस्तावेज
विशेष रिपोर्ट
 
 
मुख्य समाचार
 
भोलि स्थानीय तहको दोस्रो चरणको निर्वाचन
Wednesday, 06.28.2017, 12:02pm (GMT+5.5)


काठमाडौं ।  भोलि असार १४ गते स्थानीय तहको दोस्रो चरणको निर्वाचन हुने दिन अब संघारमै आइपुगेको छ । प्रदेश नं. १, ५ र ७ का ३ सय ३४ स्थानीय निकायका लागि भोलि बिहान ७ बजेदेखि मतदान कार्य सुरु हुनेछ । एक महानगरपालिका, ८ उपनगरपालिका, १ सय ११ नगरपालिका र २ सय १५ गाउँपालिकाका गरी १३ हजार ५ सय ५६ जनप्रतिनिधिका लागि हुने मतदान कार्यमा व्यापक जनसहभागिता हुने अनुमान गरिएको छ । हिमाल, पहाड, तराई तीनवटै भौगोलिक क्षेत्रलाई समेटेर हुन गैरहेको यो निर्वाचनले प्रतिस्पर्धी  राजनीतिक दलहरूदेखि लिएर आममतदातासम्मलाई निक्कै उत्साहित बनाएको देखिएको छ । यो निर्वाचन बहिष्कार गर्ने र बिथोल्ने कसरतमा लागेको मधेशवादी दल राष्ट्रिय जनता पार्टी नेपालले निर्वाचन क्षेत्रमा ठूलै बितण्डा मच्चाउनसक्ने जुन आशंका गरिएको थियो त्यो पनि काल्पनिक त्रासमात्र रहेको स्थितिबोध भएको छ । हरेक क्षेत्रका मतदाताहरू मतदानका लागि उत्तिकै उत्साहित देखिएका छन् । पहिलो चरणको निर्वाचन जसरी शान्तिपूर्ण र सहज वातावरणमा सम्पन्न भएको थियो दोस्रो चरणको निर्वाचन पनि सहज वातावरणमै सम्पन्न हुने अपेक्षा गरिएको छ । निर्वाचन आयोगले हरेक मतदान केन्द्रमा तयारी पूरा भएको सन्देश प्रवाह गरेको छ भने सुरक्षा प्रबन्ध पनि निक्कै कडा गरिएको आभास भैरहेको छ । यस पटकको निर्वाचनमा सुरक्षा प्रबन्धका निम्ति  सेनाको प्रयोग पनि व्यवस्थित भएको छ । यो चरणको निर्वाचन निर्विघ्न सम्पन्न हुनासाथ तेस्रो चरणको निर्वाचन पनि सहज हुने र निकट भविष्यमा प्रादेशिक र केन्द्रिय निर्वाचनका लागि पनि वातावरण अनुकूल बन्ने राजनीतिक विश्लेषकहरूको अडकलबाजी छ ।
राजनीतिक संवाद सूत्रहरूका अनुसार– पहिलो चरणको निर्वाचन नतिजाले संसदको पहिलो दल नेपाली कांग्रेसलाई दोस्रो स्थानमा झारेको, सत्ताको नेतृत्व गरिरहेको अवस्थामा पनि माओवादी केन्द्रको हैसियत खस्किएको र प्रमुख प्रतिपक्षी दल नेकपा एमाले पहिलो स्थानमा पुगेको अवस्थाले सत्ता गठबन्धनलाई नराम्रोसंग झस्काएको हुँदा यस पटक एमालेलाई टक्कर दिन ठूलो कसरत गरिरहेको छ । एमालेका निम्ति पनि पहिलो चरणमा प्राप्त भएको हैसियत जोगाउन ठूलो चुनौती खडा भएको छ । हरेक दलका शीर्ष नेताहरू यो चरणको निर्वाचनलाई प्रतिष्ठाको लडाइका रुपमा लिएर पूर्वदेखि पश्चिमसम्म चुनावी प्रचारमा सरिक भएको पाइएको छ । यस चरणको निर्वाचन प्रधानमन्त्री शेरबहादुर देउवाको निर्वाचन क्षेत्रदेखि लिएर कोइराला परिवारको विराशतको रुपमा रहेको बिराटनगर एवं पूर्व प्रधानमन्त्री केपी ओलीको क्षेत्र झापा र पूर्व प्र.म. झलनाथ खनालको निर्वाचन क्षेत्र इलामसम्म फैलिएकाले शीर्ष नेताहरू नै चुनावी मैदानमा उत्रिएर आआफ्नो प्रतिष्ठा जोगाउन कस्सिएका छन् । पहिलो चरणको निर्वाचनमा भन्दा यस पटक सत्ताशक्तिको अधिकतम उपयोग भएको आभास स्वतन्त्र पर्यवेक्षकहरूले समेत पाएका छन् । स्थानीय जनताको मनोभावना र राजनीतिक उपादेयताको कुनै ख्यालै नगरी हठवादी धारणा राखेर निर्वाचन बहिष्कार गर्ने र बिथोल्ने गलत बाटोमा लागेको राजपाको वास्तविक धरातलीय शक्ति परीक्षा पनि यो निर्वाचनले गराएको छ । 
तराई क्षेत्रका जनताको अभिमत भन्दा बाहिरी शक्तिको आशीर्वाद र निर्देशनलाई मूलमन्त्र र शक्तिको स्रोत मान्ने मनोदशाले राजपाका नेताहरूलाई ठूलो राजनीतिक संकटमा पारेको प्रष्ट आभास भैरहेको छ । अहिलेको माहोलले राजपाका नेताहरूलाई  हठ त्यागेर  असोज २ गते हुने तेस्रो चरणको निर्वाचनमा आउनैपर्ने सन्देश दिएको छ । राजपालाई सहभागी गराउनै नाममा एकैचरणमा गर्ने भनिएको निर्वाचनलाई दुई चरण र तीन चरणमा पु¥याउनु महाभूल थियो र सुनियोजित षडयन्त्रकै उपज थियो भन्ने आशंकालाई विकसित घटनाले पुष्टि गर्दैआएको छ । भोलि हुने मतदानले जुनै दललाई अग्रस्थानमा ल्याए पनि त्यसले स्थानीय विकासलाई नयाँ गति दिने र राजनीतिक समायोजनको सम्भावनालाई फराकिलो पार्ने अपेक्षा बढिरहेको छ ।
स्थानीय तहको निर्वाचनलाई चरणबद्ध रुपमा लम्ब्याउनुको पछाडि आगामी माघ ७ गतेभित्र प्रादेशिक र केन्द्रिय निर्वाचन यथा समयमा हुन नदिने र संविधानको कार्यान्वयनलाई बिफल पार्ने नियत लुकेको एकथरिले आशंका गरिरहेका छन् । राजपाको राजनीतिक जरो मुलुक बाहिर रहेको र तेस्रो चरणको निर्वाचनमा भागलिने कुनै प्रत्याभूति पनि नरहेकाले  विद्यमान राजनीतिक संकटबाट मुलुकले सहजै निकास नपाउने आशंका पनि यथास्थानमा नै छ । अहिले आआफ्नो क्षेत्रमा राजनीतिक हैसियत जोगाउन हरेक दलका शीर्ष नेताहरू ज्यूज्यान दिएर लागिपरेका भए पनि राजनीतिक समायोजनको मूल समस्याको निराकरण अहिलेको निर्वाचनले गर्न नसक्ने उत्तिकै सत्य छ । स्थानीय तहको निर्वाचनले स्थानीय जनतालाई उत्साहित बनाएको र विकासको सम्भावना बढेको अनुभूत भए पनि निर्वाचनबाट प्रादेशिक संरचना व्यवस्थित गर्न र केन्द्रिय निर्वाचनबाट स्थिर सरकार बन्ने अवस्था सिर्जना नहुँदासम्म मुलुकले राजनीतिक संकटबाट पार पाउनसक्ने कुनै सम्भावना छैन । 
निर्वाचनको संघारमा नवलपरासी, रुपन्देही तथा अन्य स्थानमा बम बिस्फोट भयो । झापाको बिर्तामोडमा विभिन्न स्थानमा बम फेला परे । उम्मेदवारका घरमा पनि बम बिस्फोट गराइयो । यी घटनाहरुले निर्वाचन बिथोल्ने कुनै सम्भावना छैन । र आम मतदाताले यसलाई त्रासको रुपमा लिन आवश्यक पनि छैन । अब यतिबेला दोस्रो चरणको निर्वाचनपछि मतपरिणामको विषय अहिलेदेखि नै चासोमा रहेको छ । पहिलो चरणको मतगणना व्यवस्थित र छिटो छरितो रुपमा हुन नसक्दा उत्पन्न विवाद र अन्योललाई चिर्न निर्वाचन आयोगले कस्तो तयारी गरेको छ त्यो मतगणनापछि नै थाहा हुनेछ । लामो समयसम्म मतगणनाको प्रक्रिया लम्ब्याइरहँदा अनेक विवाद निस्कने पक्का छ । भरतपुर महानगरपालिकाको विवाद यसैको उपज हो । आउँदा दिनमा त्यस्तो गल्ती नदोहोरियोस् र आयोगले आफ्नो संवैधानिक जिम्मेवारी कुशलतापूर्वक निर्वाह गरोस् भन्ने आमअपेक्षा छ ।


Rating (Votes: )   
Share     Print


Other Articles:
किन बन्द गरियो ७६ करोड अनियमितताको फायल (06.28.2017)
कुर्सी हत्याउने तालमेलको नतिजा के होला ? (06.28.2017)
राजपा जनताबाट तिरस्कृत : पैतीसवटै जिल्लामा निर्वाध उम्मेदवारी दर्ता (06.22.2017)
रोक्न सकेन अबरोध र बिरोधले (06.22.2017)
युगसम्वाद ३०औं वर्षमा प्रवेश (06.22.2017)
“कार्यकर्ता असल छन्, नेतामा हठ छ” (06.22.2017)
राजपाको निर्णय प्रत्यूत्पादक (06.15.2017)
निर्वाचन बिथोल्न ‘राजपा’को निर्देशित आन्दोलन : देउवा सरकारमाथि भारतको चर्को दवाव ! (06.15.2017)
पुनः मतदानको विवाद र लुरे नजीर (06.15.2017)
संसदमा १२ खर्ब ७८ अर्ब रुपैयाँको बजेट प्रस्तुत (05.31.2017)
निर्वाचन बिथोल्दा मधेशीको हित हुन्छ कि पराईको ? (05.31.2017)
फिर्ता भो महाअभियोग प्रस्ताव (05.31.2017)
दुई वर्षे बालकको हत्या पनि राजनीति मुद्दा ? (05.24.2017)
सत्तापक्ष नै उत्रियो धाँधलीमा : दोस्रो चरणको निर्वाचनको प्रतिक्षामा आम मतदाता (05.24.2017)
असीमित अधिकार छ जनप्रतिनिधिलाई (05.24.2017)
पहिलो चरणको निर्वाचनमा व्यापक जनसहभागिता : दोस्रो चरणको व्यग्र प्रतिक्षा (05.17.2017)
ऐतिहासिक छ स्थानीय तह निर्वाचन (05.17.2017)
प्रचण्डले कांग्रेसलाई भोट हाल्दा ... (05.17.2017)
देशभर निर्वाचनको उल्लास : जेठ १५ अगावै बजेट ल्याउने कसरतमा सरकार (05.11.2017)
स्थानीय तह निर्वाचन लोकतान्त्रिक महोत्सव (05.11.2017)



 
::| Latest News

 
[Page Top]